Var trygg på opprykk etter éin spesiell kamp: – Viste kva som budde i laget

– Eg trur ikkje heilt at vi har landa etter den euforien vi opplevde nede på Intility.

Det seier dagleg leiar, Thor-Erik Stenberg, i KFUM, i Discovery-podkasten «Indre bane», tre dagar etter at opprykket var eit faktum.

KFUM, ofte berre kalla «Kåffa», trengte berre å vinne éin av sine to siste kampar for at det eventyrlege opprykket skulle skje. Dei lykkast på første forsøk, og neste år skal laget frå Ekeberg spele i Eliteserien for første gong i historia.

– Dette er langsiktig, grundig arbeid over tid. KFUM har ikkje hatt noko klar strategi om å bli ein Eliteserie-klubb, men ein klar strategi på å bli litt betre kvar dag, og litt betre kvart år.

Den daglege leiaren fortel at han som supporter har vore livredd sidan sommaren for at opprykket skulle gå i vasken.

– Eg slit med å sitte stille på kamp. Eg trur det er spor etter meg i gangane etter at eg har trava att og fram dei siste ti minuttane. Gleda og draumen har vore stor, fordi vi har sett kvaliteten, spesielt på trening, seier Stenberg og held fram:

– Så har vi den rolege, administrative leiaren som skal styre denne klubben. Men draumen har vore der. Det er draumen og håpet om å lykkast som gir energi i kvardagen til å jobbe med dette.

– Etter Sogndal-kampen var eg ganske trygg eigentleg. Eg meiner at det er den kampen der vi viste kva som budde i laget. Det var ein litt «så der» Raufoss-kamp etter ein landslagspause der vi var litt usikre: Er vi i dårleg form no? Klarer vi dette? Så drar dei gutane til Sogndal og drar tre mål opp av hatten i ein kamp med eit ekstremt press i.

Sidan opprykket begynte å bli realistisk har det vore mykje snakk om stadionen til «Kåffa», då den ikkje er godkjent for Eliteserie-spel. Stenberg fortel at plan A framleis er å spele på Ekebergsletta.

For at den nyopprykka klubben skal kunne gjere det, trengs stadion ei oppgradering. No manglar dei godkjende fasilitetar for blant anna garderobe, tribune og lys.

– Det skal vere trygt og godt for publikum å vere på kamp, sjølv om du kanskje blir litt våt i lokkane og det er litt vind frå Groruddalen, seier Stenberg.

Garderobane til spelarane er i hallen over vegen. Spelarane må vente på at 74-bussen køyrer forbi før dei kan gå over vegen og inn på stadion.

– Det kan vere at spelarane må vente på 74-bussen, men eg synes eigentleg at desse Bodø-, Tromsø- og Rosenborg-gutane berre har godt av å lære korleis det er å vente på bussen, seier Stenberg og ler.

Onsdag fekk klubben innvilga rammeløyve til ny arena. No manglar dei berre at bystyret vedtar den kommunale garantien. Den garantien vil kunne auke sjansane for å bruke dagens stadion fram til den nye står ferdig, ifølge NRK.

Ekeberg-laget har no nokre månadar på seg for å klargjere seg til Eliteserie-spel.

– Vi treng dei dagane vi har.

Og sjølv om Eliteserien ventar neste år, ser klubben allereie fleire år fram i tid.

– 2024 blir eit «hurra»-år det, og vi skal gjere det bra der, men det viktigaste er kor vi er i 2026. Då ønsker vi å vere i Eliteserien, men vi skal også vere rigga for å vere knallsterke i Obos-ligaen om det skjer. Eg trur det er ein av styrkane våre, at vi tenker langsiktig.