Landslagsdebuterte denne veka – no er han klar for eliteserieklubb

Då Jan Peder Jalland skulle ta ut U21-troppen til kampane mot Nederland og San Marino, dukka det plutseleg opp eit namn som aldri før har vore med på ei landslagssamling.

Tobias Kvalvågnes Guddal vart tatt ut til troppen, sjølv utan ei einaste aldersbestemt landslagssamling i bagasjen.

Det stadfestar klubben på heimesida si.

– Tobias er ein ung og spennande stoppar. Han er ein perfekt profil for måten vi driv spelarlogistikken vår, seier sportssjef Lars Petter Kræmer-Andersen til klubben.

Guddal har signert ei kontrakt som strekk seg ut sommaren 2028.

Midtstopparen kjem frå Bryne som speler i 1. divisjon. Der har han levert svært overtydande.

– Første halvdel av sesongen var eg på lån i Levanger og fekk mykje god erfaring. Eg måtte tilbake til Bryne fordi dei hadde nokre skadeproblem på stopparplass, og eg blei kasta litt inn i det. Eg vaks veldig på det, fortalde midtstopparen til Discovery etter landslagsuttaket.

Guddal blei henta tilbake då klubben låg på 13. plass. Med 21-åringen i startellevaren gjorde Bryne kraftige byks oppover på tabellen, og enda til slutt på ein 6. plass.

– Det var utruleg kult (å få beskjeden). Det kom litt som eit sjokk for meg også, sa Guddal til Discovery.

Tromsø møter Brann i serieopninga. Allereie der kan Guddal vere aktuell for ein plass i troppen.

Laurdag måtte nemleg midtstoppar Kent-Are Antonsen av med skade i treningskampen mot HamKam. Han fekk seg ei vriding i kneet.

29-åringen skal ta MR-bilde søndag for å finne ut kor lenge han må vere ute.