Klart for skandinavisk duell: – Får sjå kva for ein viking som er sterkast

Casper Ruud og Holger Rune har med tida blitt to ordentlege skandinaviske rivalar.

Dei har møtt kvarandre totalt seks gongar på ATP-touren, der fem av kampane har enda med siger i favør nordmannen. Dansken fekk sin første og einaste siger mot Ruud under Masters 1000-turneringa i Roma i 2023.

Fredag skal dei opp mot kvarandre igjen, denne gongen i Ultimate Showdown Tennis-turneringa (UTS), der reglane er noko heilt anna enn det spelarane er vande med på ATP-touren. I UTS spelar ein blant anna på tid, og det er berre lov med éin serve.

Rune legg ikkje skjul på at duellen motiverer han.

– Det er ein bra kamp, og den kampen publikum vil sjå. Det gir meg openbart litt ekstra motivasjon å få spele mot Casper i Noreg, så eg gler meg, seier Rune til Discovery.

Ifølge Ruud har det lenge vore snakka om å få til «slaget om Skandinavia» nettopp i Skandinavia i lengre tid.

– Dette blir den første. Det kjem til å bli gøy, og så får vi sjå om dei danske eller norske vikingane som er dei sterkaste, seier Ruud.

– Eg håper berre publikum kan hjelpe meg litt.

Dansken håper derimot at nokon i publikum vil heie litt ekstra på han.

– Noreg er jo veldig nærme Danmark, så eg håper nokre danskar vil kome hit og støtte meg.

Under UTS-turneringa opererer spelarane med kallenamn. Ruud blir kalla «The Iceman», medan Rune har fått kallenamnet «The Viking». Sjølv om viking-tradisjonen står både Noreg og Danmark nær, er ikkje Ruud sjalu på namnet til motstandaren.

– Eg fekk faktisk tilbodet om det namnet eg også, men eg takka høfleg nei. Eg veit eigentleg ikkje kvifor, men det skjedde så kjapt då eg bestemte meg. «The Iceman» er greitt det også. Det er mange av spelarane som eg har møtt her som klager på at det er litt vel kaldt i Noreg, så vi får tenke at «The Iceman» får gjere det bra under desse forhalda, seier nordmannen til Discovery.

Rune vil ikkje peike på ein favoritt i førekant av oppgjeret.

– Det er vanskeleg å seie. Eg har ikkje spelt tennis på nokre dagar no, så vi får sjå korleis nivået mitt er.

Førre veke måtte dansken trekke seg frå semifinalen i Open Sud de France med ein skade i høgre olboge. Dermed har ikkje 20-åringen fått trena som normalt.

– Eg føler meg bra no, og har hatt nokre dagar fri før eg kom til Oslo. Eg hadde mi første trening på onsdag, så vi får sjå korleis det går.