Kan bli tennisstjerna sin siste sesong: – Livet er mykje viktigare

Dominic Thiem har vore profesjonell tennisspelar i 13 år, men no kan det nærme seg slutten for den austerrikske tennisspelaren.

30-åringen var rangert som nummer tre i verda i 2020. Etter det har han falle nedover rankinglista.

I fjor avslutta han året som nummer 98. i verda, og året før var han nede på 100. plass. I eit intervju med den austerrikske avisa Der Standard opna Thiem opp om framtida.

– Eg ser på dette som min siste sjanse. Om eg endar året på nummer 100 igjen, så må eg vurdere om alt framleis er verd det.

– Det er det eg følar akkurat no, men eg har alt i mine eigne hender. Om eg speler ein god sesong og avsluttar høgare på rankinga, kjem eg sjølvsagt ikkje til å vurdere alt på nytt, seier Thiem til Discovery.

I 2020 vann Thiem sin første og einaste Grand Slam-tittel under US Open. Tennisspelaren står også med 17 ATP-titlar. Sjølv om han har oppnådd mykje, vil ikkje det vere eit fokus når han vel å leggje racketen på hylla.

– Det vil alltid vere to delar: tennisen og livet. Livet er openbart mykje viktigare. Uansett kva som skjer i tennisen og karrieren min, så vil eg ikkje at det skal ha noko innflytelse på livet mitt etterpå.

Likevel legg ikkje tennisspelaren skjul på at det er fleire ting han vil oppnå i løpet av karrieren.

Thiem skal no ha rundt to veker fri frå turneringsspel, for å prøve å kome så nær sin beste tennis som mogleg.

– Eg har mykje tid på å jobbe meg oppover på rankinga igjen, og det er eit mål. Då treng eg ikkje vurdere noko på slutten av sesongen. Eg håpar jo at det blir slik.

Thiem har hatt ei innhaldsrik start på sesongen. Under ein kvalifiseringskamp i Brisbane International-turneringa tok ein giftig slange seg inn på bana.

– Det har skjedd mykje i år. Slangen var veldig interessant og morosam, fortel tennisspelaren.

Seinare i turneringa spelte Thiem mot Rafael Nadal i det som var Nadal sitt comeback etter å ha vore ute av spel i lang tid.

– Det å spele mot Rafa er alltid spesielt. Eg har spelt to turneringar i år. I den første spelte eg mot Rafa og i den andre spelte eg mot Felix (Auger Aliassime, journ. anm), så det var to veldig tøffe motstandarar.