Uno-X imponerte i storritt

Tobias Halland Johannessen låg framme i tet dei siste kilometerane av La Flèche Wallonne. I siste bakken opp velkjente Mur de Huy vart han tom for krefter, og enda til slutt som nummer seks.

– Eg følte at eg hadde gode bein, men det var ei tøff utgåve, og eg var ganske kald, så det var vanskeleg å presse heilt til siste slutt. Vi kan vere veldig stolte av dagen, sa Tobias Halland Johannessen etter målgong.

Uno-X var sentrale i store delar av rittet. Dei henta inn alle som forsøkte seg på eit brot, og hadde fleire framme ved slutten av rittet.

Syklist Thomas de Gendt var også imponert over det det norsk-danske sykkellaget viste.

– Kva enn Uno-X-gutane hadde til frukost skal eg ha før mitt neste ritt, skreiv han på X.

Stephen Williams vann rittet, etterfølgd av Kevin Vauquelin og Maxim van Gils.

Rittet var prega av mykje regn og låge temperaturar.

– Vi var veldig førebudd på vêret. Vi visste at når det begynte å snø, så kom det berre til å ta ein halvtime før feltet var vekke.