Straffebom felte Noreg i skjebnekamp: – Mykje å jobbe med

Mykje stod på spel då Noreg møtte Austerrike tysdag kveld for den avsluttande kampen i Nations League-gruppespelet. Eit tap ville bety kvalikk, og i verste fall direkte nedrykk til B-nivået i Nations League.

Austerrike gjekk tidleg opp i leiinga, og sjølv med fleire store sjansar og straffe i andre omgang, klarte ikkje Noreg å hente inn leiinga. I sluttminutta auka Austerrike leiinga ytterlegare, men Noreg slo hardt tilbake etter ei scoring frå Karina Sævik. Tida rann ut for Noreg til å skape endå fleire sjansar etter scoringa, og det norske laget måtte dra tomhendt heim frå Austerrike.

Heldigvis for Noreg tapte Portugal mot Frankrike, noko som betyr at Noreg held tredjeplassen i gruppa og unngjekk direkte nedrykk.

No må altså Noreg ut i eit dobbeltoppgjer mot gruppetoaren på nivå B våren 2024. Om Noreg vinn det oppgjeret, vil dei halde på plassen sin på nivå A, men om dei tapar må dei ned på nivå B. I praksis vil det å spele på nivå B bety ein mykje lengre veg til eit eventuelt EM.

Austerrike fekk tidleg kontroll på kampen, noko som resulterte i ei tidleg leiing. Heimelaget kom seg forbi på høgresida og Lilli Purtscheller slo eit presist innlegg, som Eileen Campbell forlenga ned i det lengste hjørnet.

Sjølv om det norske laget tidvis hadde nokre sjansar til å utlikne, var det Austerrike som styrte største delen av den første omgangen. Laga gjekk til kvile med 1-0-leiing til heimelaget.

– Vi slit litt i første omgang. Vi klarer ikkje å setje presset, var dommen til landslagstrenar Leif Gunnar Smerud direkte etter kampslutt.

Landslagssjef Leif Gunnar Smerud gjorde tre bytar i pausen, og det var eit norsk lag med ny energi som entra bana.

Fleire av innbytarane bidrog til å blåse liv i kampen, og allereie i dei første speleminutta etter kvilen hadde gjestane skapt fleire sjansar.

Innbytar Celin Bizet Ildhusøy hadde ein spiss vinkel på mål i det 49. speleminutt, men valte likevel å gå på skotet. Skotet gjekk rett i keeper.

Noreg heldt fram med å presse på og skapte sjansar på rekke og rad. Sophie Román Haug, som kom inn for Ada Hegerberg som har slitt med ein skade den siste tida, hadde to hovudavslutningar på mål som ikkje fann nettmaskene, medan Ildhusøy og Bizet hadde to skot som gjekk utanfor mål.

Austerrike heldt derimot fram med å presse på, og auka til 2-0 to minutt før ordinærtid var ute.

Tre minutt på overtid lykkast det for Noreg, og Sævik reduserte.

I førekant av kampane mot Portugal og Austerrike la ikkje Hegerberg skjul på at det er viktig for landslaget å halde seg på nivå A.

Eit eventuelt nedrykk er ikkje noko stjernespelaren har brukt mykje tid på å tenke på.

– Eg har berre tenkt på realiteten vi står i éin gong. Etter det la eg det bak meg.