Trur Ruud-siger gir ketchupeffekt: – Kan vinne Roland Garros

Casper Ruud vann i strake sett over Stefanos Tsitsipas i Barcelona Open og sikra med det ein siger i ei ATP 500-turnering. Nordmannen har aldri vunne ei så stor turnering før.

Discoverys tenniskommentator Svein-Espen Lindås Olsen vart svært imponert over det han såg av Ruud undervegs i kampen, spesielt med tanke på at han fekk den verst tenkelege starten på kampen ved å bli brote i første game.

– Då er det lett å få seg ein på trynet. Eg er imponert av at han held hovudet kaldt, og bryt tilbake. Då han først gjekk opp til 6-5 var det ikkje tvil om at han var best, seier Lindås Olsen.

– Det kjem nok litt av at han har hatt så mykje finaleerfaring. Han veit kor nære han har vore. Det var akkurat som at han ikkje ville tape ein finale til.

Undervegs i finalen kommenterte TV 2-kommentator Sverre Krogh Sundbø at Ruud ikkje har spelt ein gruskamp så langt i sesongen på det nivået som han leverte søndag kveld.

– Eg er villig til å kalle dette årets beste tenniskamp frå Casper. Han har gjort det meste riktig.

Det stiller Lindås Olsen seg bak.

– Dette var høgt nivå og ein kanonmatch frå Casper. Ein ser tydeleg den jobben han har gjort med å prøve å spele meir offensivt, som han ville gjere denne sesongen. Ein ser også at fysikken hans er bra. Han toler å springe, og då blir han vanskelegare å spele ut.

Dermed kan framtidsutsiktene for sesongen sjå ganske så gode ut for nordmannen, ifølge Lindås Olsen.

– Casper er i kanonform. Det er berre å glede seg.

25-åringen står no med 11 titlar, og kommentatoren trur ikkje denne tittelen vil bli den siste:

Roland Garros er berre ein månad unna, og Lindås Olsen er ikkje framand for at den første Grand Slam-tittelen kan kome allereie då.

– Eg gjekk ut tidleg i år og sa han kom til å vinne Roland Garros. Det er litt tøft å seie, men no har han vore i fleire finalar og speler betre allereie, så kvifor ikkje?