Vil vise seg frå ei betre side: – Handlar mykje om stoltheit

– Eg føler ting har blitt gjort veldig etter planen. Vi har hatt ei veke no der vi har fått køyrt på litt.

Det seier Ada Hegerberg ei vekes tid før ho og det norske landslaget møter New Zealand på deira heimebane, i opningskampen i VM.

Det norske landslaget reiste ned til New Zealand 4. juli, og har brukt nokre dagar på å kome seg.

– Det var ei ganske lang reise og stor tidsforskjell, så tida har berre blitt brukt til å kome oss inn i ei normal døgnrytme med søvn og trening. Det må skje litt gradvis.

20. juli er Noregs opningskamp, ein kamp spelarane er spente på.

– Eg er veldig gira på å få starta i gong meisterskapet. Eg merker på ei spenning, seier Bayern München-spelar Tuva Hansen.

Under fjorårets EM fekk Noreg ein tidleg exit. Fleire av spelarane var spesielt prega etter marerittkampen mot England, der dei gjekk på eit 8-0 tap.

– Vi har veldig lyst til å slå tilbake. Eg kan love at for oss, så handlar det om å vise at vi er her for ein grunn. Det handlar mykje om stoltheit: Vi representerer eit heilt land på den største scena, seier Hegerberg.

Det er Guro Reiten einig i.

– Eg trur vi er betre enn det vi fekk fram den gongen, og vi håper vi kan klare å vise dokke det.

Chelsea-spelaren meiner det er fleire grunnar til at ho meiner det er eit betre landslag som møter New Zealand.

– Vi er alle eitt år eldre, og har litt meir erfaring. I tillegg har vi eit nytt trenarteam og ein ny måte å spele på. Vi har fått gode resultat mot gode nasjonar, og eg synest kanskje at vi heng meir saman som eit lag.

Den første testen for Noreg kjem i ein uoffisiell, lukka kamp mot Portugal søndag. Det trur Hansen vil vere ein fordel for laget.

– Då kan vi prøve litt forskjellige triks og sjå kva som fungerer, gjere bytte og andre ting.

Reiten er einig med lagkameraten:

– Eg trur det blir ekstremt viktig å få ein kamp før det brakar laus. Vi har ikkje spelt kamp saman på ein god stund. Slik er det på landslag: Alle forsvinn, og så møtes vi i ti dagar og alt skal sitte. Slik er det ikkje alltid, så det blir ei veldig viktig øving for oss.