Éin ting motiverer ekstra mykje: – Alle drøymer om det

I enden av Nations League-turneringa venter det nokre OL-billettar. Det er ein stor motivasjon for fleire av dei norske spelarane.

Det seier Elisabeth Terland til Discovery. Ho vart vraka frå landslaget i førekant av VM, men no er ho tilbake i varmen, og klar for å gjere ein innsats for å gje det norske landslaget ein kjempestart på vegen mot OL-billetten.

– Eg vil bidra og gjere det beste for landet mitt, så det er veldig deilig å vere på samling igjen, seier ho til Discovery.

For Tuva Hansen er OL også eit stort mål.

– Det hadde vore utruleg kult. Det er veldig stort, og alle fotballspelarar ønsker å delta i OL, seier Hansen.

For å få den billetten må dei gjennom fleire hinder, og det første venter allereie på fredag, då Noreg møter Østerrike på heimebane. Tuva Hansen trur laget har nokre spennande kamper i møte.

– Det kan bli jamne kamper, men eg håper verkeleg at vi kan vise oss frå vår beste side, og vinne kampane, seier ho til Discovery.

Nålauget for å kome til OL er svært trongt. Noreg må vinne gruppa si i Nations League, i tillegg til at dei er avhengige av å vinne semifinalen i februar. Der er det berre plass til dei fire gruppevinnarane på A-nivået.

Det seier landslagssjef Leif Gunnar Smerud seg einig i.

– Det er eit trongt nålauge sjølvsagt. Eg har vel ikkje vore nærmare ein OL-billett nokon gong, så vi må prøve.

Laga speler ikkje berre om OL-billettar, men også om rangeringspoeng. For Smerud veg det eine tyngre enn det andre.

– Om vi ikkje gjer det, så er det mykje anna å spele om. Det held fram med tanke på seeding og neste runde i Nations League. Det er viktig å karre til seg alle poeng og alle måla vi kan få, men det er klart at ein OL-billett ville definert Nations League som noko bra, legg Smerud til.

Etter at Noreg har møtt Østerrike på Ullevaal, går turen sørover til Portugal, for ein Nations League-kamp der tysdag.