Knuste Noregs EM-draum – no er dei svoltne på revansje

Sjølv om det er kampen mot England, der Noreg gjekk på eit 0-8-tap, som kanskje står sterkast blant dei norske spelarane etter EM 2022, var det kampen mot Austerrike som sette spikaren i kista for den norske EM-draumen.

Ein 1-0-siger til Austerrike var nok til å sende Noreg ut av meisterskapet, medan motstandarane kunne gå jublande vidare til utslagsrundene.

– Publikum kan forvente ein norsk gjeng som ønsker å vise seg fram, ta tak i kampen, og gripe ein god moglegheit, seier landslagssjef Leif Gunnar Smerud til Discovery.

Kampen mot Austerrike er starten på Nations League. Ikkje berre er det ei ny kvalifisering, men det norske laget har også fått med seg ein ny trenar. Landslagsspelarane har måtte omstilt seg på svært kort tid, men Ingrid Syrstad Engen trur det kan vere positivt.

Sjølv om det norske laget vil vise seg fram, fortel Frida Maanum at dei framleis har respekt for laget som står på andre banehalvdel.

Både Maanum og Syrstad Engen peiker på at det austerriske laget er sterke på spesielt éin ting.

– Dei er duellsterke på midten, så det handlar om å vere førebudd på kva dei kan kome med der, seier Maanum.

– Vi fekk kjenne på det for eitt år sidan, at dei er gode i duellspelet. Vi får håpe at vi kan spele oss ut av det, og ha ballen mest sjølv. Det blir ein tøff kamp, seier Syrstad Engen.

Julie Blakstad var ein av spelarane som spelte skjebnekampen mot Østerrike. Den gong vart ho brukt som forsvarsspelar, men under Hege Riise og Leif Gunnar Smerud har ho fått ei rolle som ein meir offensiv spelar.

Dei kvalitetane håper ho at ho kan bruke til å ta heim tre poeng for fedrelandet.

– Eg trur det kjem til å bli ein tøff kamp, og eg trur Østerrike kjem til å kome ut i hundre. Det er viktig at vi er på frå start, så håper eg at vi klarer å bite frå oss og vise at vi har mykje å by på, seier Manchester City-spelaren.