Siger i Georgson sin første test – LSK-spelar av med skade

Laurdag var det duka for årets første kamp for Lillestrøm og nyopprykka Fredrikstad.

Kampen vart LSK-trenar Andreas Georgson sin første test. Han tok over jobben som trenar i klubben 8. januar. Det starta på best mogleg vis.

Lillestrøm gjekk opp i leiinga etter 62 spelte minutt, men Fredrikstad utlikna like etterpå.

Dei gulsvarte hadde meir på lager, og med eitt minutt igjen av ordinær tid scora den 17 år gamle prøvespelaren Nathaniel Ariheri.

Det vart ein mållaus førsteomgang. Lillestrøm hadde ein kjempesjanse i det 11. speleminutt då Henrik Skogvold klinte ballen rett i tverrliggaren.

Fredrikstad laga to sjansar ved slutten av omgangen, men alt vart klarert av Lillestrøm-forsvaret.

Ifølge kommentator Morten Svesengen fekk forsvarsspelaren ein liten skade i skuldra.

– Eg snakka med Garnås i pausen. Hadde det vore ein eliteserie-kamp hadde han spelt vidare sa han, men det fekk han ikkje lov til.

Fredrikstad skapte omgangens første sjanse, men heller ikkje der skulle det lykkast for det nyopprykka eliteserielaget.

Det gjorde det derimot for Lillestrøm. El Schaddai Furaha vann ballen i Fredrikstad sin 16-meter, og sat kontrollert inn 1-0-målet.

Dei raud-kvite byta så ut omtrent heile laget, og det gav resultat. Berre tre minutt etter Lillestrøm si scoring utlikna Fredrikstad, etter eit sjølvmål frå Ruben Gabrielsen.

Ved slutten av kampen sat Ariheri den avgjerande scoringa.