Keeperkonkurransen spissar seg til: – Ein knallsterk søknad

I skadefråværet til førstekeeper Andrè Hansen har 20 år gamle Sander Tangvik fått tillit i buret dei siste tre kampene.

I dei to siste kampane, mot Stabæk og Vålerenga, har trønderen verkeleg vist seg fram og vore direkte avgjerande med strafferedning i begge kampene.

– Det følast bra. Det er alltid artig å redde straffe, og spesielt i dag når vi får tre poeng i tillegg, seier Tangvik, som står med seks kampar i Rosenborg, til Discovery etter 3-1-sigeren over Vålerenga i helga.

Kontrakten til Hansen i Rosenborg går ut ved årsskiftet, og frå og med 1. januar blir han Odd-spelar. Då opnar plassen som førstekeeper seg opp.

– Eg har fokus på året her no, og dei kampane som er igjen, så får vi ta 2024 som det kjem.

Likevel legg han ikkje skjul på at han håper dei siste prestasjonane gjer at han kan få full tillit i mål.

– Eg håper at eg forsterkar min kandidatur i alle fall.

Trenar Svein Maalen er svært fornøgd over kva ungguten Tangvik har vist den siste tida.

Maalen meiner likevel at det er lett å bli blenda av veldig sterke prestasjonar over kort tid.

– Vi har kjempetrua på at Sander kjem til å bli ein veldig god keeper, men han vil nok også variere litt i prestasjonar. Det er for å vere realistisk.

Tidlegare denne veka vart det klart at kampen om å bli førstekeeper spissar seg til ytterlegare: Rasmus Sandberg vender tilbake til Rosenborg etter at han forlet klubben i førekant av 2021-sesongen. Han blir speleklar etter nyttår.

U21-landslagskeeperen, som har signert ei fireårskontrakt, har vore ei sentral brikke for Stjørdals-Blink dei siste sesongane.

Den nyinnhenta keeperen trur det blir ein bra konkurranse om plassen.

– Sander har vore heilt strålande, så får den som bli vurdert som best spele, seier Sandberg til klubben si heimeside.