Klokkeklar beskjed før kvalifiseringa: – 100 prosent sjanse for at vi skal til OL

Torsdag til søndag skal Noreg gjennom tre kampar for å sikre ein billett til årets olympiske leikar.

Det blir ikkje noko problem ifølge landslagsspelar Tobias Grøndahl.

Først må Noreg bli nummer ein eller to i gruppa si under kvalifiseringa. Dei er i gruppe med Ungarn, Portugal og Tunisia.

– Det blir ei utruleg tøff kvalifisering. Vi må vere på topp. Om vi ikkje er det, kan vi fort tape alle tre kampane. Det er litt kjedeleg å seie, men vi tar ein kamp om gongen, og så er det ikkje tvil om at alle kjem til å gjere det dei kan for å kome seg til OL, seier Grøndahl.

Grøndahl speler til vanleg på Elverum, der han har kontrakt ut sesongen. Under EM i januar var bakspelaren den einaste Elverum-spelaren på landslaget, men denne gongen har han fått med seg ein til: Kasper Thorsen Lien.

– Han har ein fysikk frå ei anna verd. Han hoppar så høgt han vil og skyt så hardt han vil. Når han har så god tid i lufta, så kan han vurdere kva skot han kan ta gjentatte gonger, seier bakspelaren og held fram:

– No har han også begynt å bli litt meir uføreseieleg i skota. Det er ikkje berre dei standard skota, men han er litt meir leiken som gjer det vanskeleg for keeperen å stoppe han, seier Grøndahl.

Lien påstår sjølv at han er i OL-kvalifiseringa som læregut. Det meiner Grøndahl er altfor audmjukt.

– Om Bjørnsen slit eller treng ei pause, så er det ingen tvil om at Kasper sit på tærne og er klar for å kome på. Gjer han det, så er eg ganske sikker på at han gjer som han pleier, som er å setje ballen i mål.

For begge Elverum-spelarane ville det vore ein draum å få vere med å kvalifisere landslaget til OL.

Det seier Grøndahl seg einig i:

– Personleg har OL vore ein ting eg har drøymt om sidan eg begynte med handball. Du får ikkje mange moglegheiter til å oppleve det, så det hadde vore ein gutedraum for min del.

Bakspelaren har også eit ønske om å gjere opp for EM i januar i OL-kvalifiseringa. Der leverte ikkje det norske landslaget slik dei sjølv hadde håpa på, og det blei ein bråstopp i hovudrunda.

– Vi synest at vi skal vere oppe og kjempe om medaljar. Då er ikkje det vi leverte i januar godt nok. Vi har lyst til å oppleve OL, men også levere ein betre figur enn i januar. Dette er første moglegheit til å gjere opp for det, seier Grøndahl.

Torsdag 14. mars klokka 18.30: Norge - Portugal

Laurdag 16. mars klokka 19.30: Norge - Ungarn

Søndag 17. mars klokka 18.30: Tunisia - Norge

Kristian Sæverås, SC DHfK Leipzig Handball

Sander Drange Heieren, TTH Holstebro

Torbjørn Sittrup Bergerud, Kolstad Håndball

Thomas Solstad, Bjerringbro-Silkeborg

Petter Øverby, THW Kiel

Magnus Gullerud, Kolstad Håndball

Vetle Eck Aga, Kolstad Håndball

Sander Sagosen, Kolstad Håndball

Sander Andreassen Øverjordet, KIF Kolding

Erik Thorsteinsen Toft, KIF Kolding

Kent Robin Tønnesen, Paris Saint-Germain

Tobias Grøndahl, Elverum Håndball

Christian O'Sullivan, SC Magdeburg

Harald Reinkind, THW Kiel

Gabriel Setterblom, Kolstad Håndball

Simen Ulstad Lyse, Kolstad Håndball

Sebastian Barthold, Aalborg Håndbold

Kristian Bjørnsen, Aalborg Håndbold

Kasper Thorsen Lien, Elverum Håndball

Alexander C. Blonz, GOG Håndbold