Gir «nykommar» sjansen når Noreg har kniven på strupen: – Veldig gøy

– Det er sjølvsagt veldig gøy å få tilliten.

Det seier Elverum-spelar Kasper Thorsen Lien til Discovery.

Han er ein av spelarane som får sjansen i Jonas Wille sin tropp til OL-kvalifiseringa i mars.

Wille ringde med landslagsbeskjeden dagen før NM-finalen.

– Hovudet var litt på ein annan stad, men det var ein veldig fin beskjed å få inn mot finalen. Det er ein bonus å ta med seg sjølvtilliten inn i kampen, seier Fredrikstad-guten.

På motsett banehalvdel stod Kolstad. Laget frå Trondheim er svært landslagstungt og har heile sju spelarar i troppen til OL-kvalifiseringa. At store delar av motstandarlaget blir Lien sine framtidige lagkameratar var ikkje noko han tenkte på undervegs i NM-finalen.

– Eg klarar å skilje det litt. Der og då speler ein for gull, og ein vil ikkje noko anna enn å slå dei.

Til slutt enda det med sølv til Elverum, men 22-åringen legg ikkje skjul på at det var ei spesiell helg.

– Absolutt! Det var gøy, men vi skulle gjerne tatt gullet med oss.

Lien står med seks landskampar for Noreg, deriblant på nødlandslaget, men dette er første gong han speler kampar der ekstra mykje står på spel.

– Det er veldig kult å få tilliten, og få høyre at ein får vere med å spele kampane som tel veldig. Det har eg ikkje gjort før. Det blir ikkje noko anna enn veldig gøy, og eg skal prøve å bidra med det eg kan bidra med.

Wille gjorde berre to endringar på troppen som spelte EM i januar. Inn kom Lien og Sander Drange Heieren, medan Magnus Abelvik Røed og Kevin Gulliksen må sjå kvalikken frå sofaen.

Under meisterskapet gjekk det ikkje Noreg sin veg, og meisterskapet blei blant anna omtalt som ein fiasko av ekspertar. Lien trur det vil vere ein svært revansjelysten gjeng som skal spele i OL-kvalifiseringa.

Noreg er i gruppe med Ungarn, Portugal og Tunisia. Dei to beste frå gruppa sikrar ein OL-billett.

– Det er absolutt tøff motstand. Det er lag som er gode og i form, så vi må gjere vårt beste for å slå dei. Sjølvsagt har eg trua på at dette går fint, seier Lien.

Discoverys handballekspert Ole Gustav Gjekstad har også trua på at Noreg skal klare å sikre ein plass i leikane.

– Eg synest sjansane er gode, men det kan bli knapt. Portugal og Ungarn er to motstandarar ein skal spele godt mot for å vinne, og ein må også vere merksam på Tunisia. Dei er eit bra handballag sjølv om dei er tippa nedst, seier Gjekstad.

Gjekstad synest det er gledeleg at Lien kjem inn no når Noreg står med kniven på strupen.

– Det er nok ikkje slik at nokre nye fjes vil prege ei OL-kvalifisering, men det er fint å sjå at andre får sjansen.

14. mars 18:30 Noreg - Portugal

16. mars 19:30 Noreg - Ungarn

17. mars 18:30 Tunisia - Noreg