Nordmann i ekstase etter at Ungarn sikra OL-plass: – Heilt sinnsjukt

– Det er heilt sinnsjukt. Det står vaksne menn utpå her og grin, for å seie det sånn. Det er heilt rått.

Det seier Tord Ellingsen til Discovery etter at Ungarn kvalifiserte seg til OL under kvalifiseringa søndag kveld.

Ellingsen er norsk og jobbar til dagleg som lærar og trenar på ein vidaregåande skule i Noreg, men pendlar kvar veke til Ungarn der han jobbar som fysisk trenar for det ungarske herrelandslaget. Dermed var gleda ekstra stor då Ungarn kunne puste letta ut framfor heimepublikummet.

– Eg trur nesten det betyr mest for dei rundt her, men det betyr litt her og. Det er moro. Vi har jobba for dette, seier Ellingsen.

Ungarn vann deira første kamp mot Tunisia. I kamp nummer to venta Noreg. Der gjekk det norske herrelandslaget av med siger og den første OL-plassen. Ungarn på si side måtte ut i ein siste og avgjerande kamp.

– Kor desse gutane får kreftene frå, det skjønner eg ikkje. Laurdag tappa vi oss mot Noreg. Eg snakka med den fysiske trenaren for Noreg som sa det var mange der som ikkje ønska å spele kamp søndag. Om dei var slitne, då kan du tenke deg korleis vi var, seier den fysiske trenaren.

Med tap mot Noreg var Ungarn avhengig av å vinne mot Portugal søndag. Portugal hadde på si side kvalifisert seg til OL med uavgjort.

Ungarn fekk så ei to-målsleiing på kort tid, før dei la til eit siste mål like før kampslutt. Dermed vann dei kampen 30-27.

– Heilt jævlege. Unnskyld uttrykket, men dei var rett og slett det, seier Ellingsen.

Etter at OL-billetten var i boks venta det ei lita feiring for Ellingsen og resten av laget.

– Jo, det kan det fort bli, seier Ellingsen og ler.

OL-handballen blir spelt mellom 25. juli og 11. august.

Ellingsen og Ungarn kan få eit nytt møte med Noreg under gruppespelet i Paris. På same nivå som Noreg er Kroatia, som vil seie at dei to laga er sikre på å unngå kvarandre i gruppespelet. Ungarn unngår Tyskland i gruppespelet.