Fekk skyldfølelse etter Sagosen-utvising: – Hadde klandra meg sjølv

Under kampen mot Ungarn fekk Sander Sagosen fleire to-minuttarar. Den tredje kom etter ein duell i andreomgang, som gjorde at han blei vist det raude kortet av dommaren.

Dermed måtte det norske landslaget klare seg utan Noregs store stjerne. Då valde Alexander Blonz å ta ansvar.

Sagosen sin første to-minuttar var nemleg på grunn av eit feilbyte der Blonz var involvert.

– Gjekk du frå syndebukk til helt?

– Eg veit ikkje om det hadde vore heilt syndebukk, men eg hadde ikkje sete med ei veldig god kjensle etter kampen om vi hadde tapt.

Sagosen verka ikkje å skulde på lagkameraten, men gav både han, Tobias Grøndahl og Simen Lyse ros etter kampslutt.

– Det er fantastisk. Dei er her for å ta ansvar og melde seg på. Tobias gjer ein stor kamp, Blonz det same, Simen kjem til gode moglegheiter ... Vi har veldig mange gode handballspelarar i laget her som vi skal halde fram med å bruke mot OL.

– Det er spesielt imponerande av dei unge gutane, som Blonz, Grøndahl og Lyse, at dei leverer på dette nivået, seier han.

Søndag møter Noreg Tunisia i OL-kvalifiseringa. Kampen har ingen betyding for Noreg, då dei allereie er kvalifisert til OL.

– Det var ekstremt deilig å få det gjort. Hadde vi spelt ein dårleg kamp i dag og tapt med litt for mykje. Det er deilig å avgjere sjølv med to kampar, og eigentleg har fri i morgon.

Sjølv om kampen ikkje har betyding, har det norske laget framleis førebudd seg på motstanden som ventar.

– Vi kjenner dei ikkje så godt, men det er ein del spelarar som speler i Frankrike og Tyskland som vi kjenner til. Vi kjem til å sjå videoar av kampar dei har spelt, samt klipp frå spelarane i klubb, og vere veldig godt førebudd. Det er eit veldig godt verktøy å sjå video når ein møter spelarar ein ikkje kjenner så godt frå før, seier O'Sullivan til Discovery.