Danskane reagerer: – Vanvitig

– Det er som å sjekke årsoppgåva for å finne ut at du må betale pengar tilbake.

Det skriv danske TV 2 etter at trekninga til årets China Open vart klar.

Det er nemleg ikkje berre Casper Ruud som har fått ei tøff trekning i ATP 500-turneringa. Danske Holger Rune må også gjennom svært tøffe hinder på veg mot ein eventuell finale.

Den danske tennisstjerna er rangert som nummer fire i verda, men det fekk han ikkje stor utteljing for då det vart bestemt kven han skulle møte i første runde av China Open.

20-åringen møter nemleg canadiske Felix Auger-Aliassime, som er rangert som nummer 14, i første runde. Dei to har møtt kvarandre to gongar før i 2022, og står med ein siger kvar i dei to oppgjera.

Auger-Aliassime har tidlegare vore rangert som nummer seks i verda, men har den siste tida hatt ein formdupp, som har gjort at han har sklidd ned på verdsrankinga.

Om Rune kjem sigrande ut av oppgjeret, ventar potensielt Grigor Dimitrov (20), Jannik Sinner (7) og Carlos Alcaraz (1). Dansken kan også møte Casper Ruud, om Ruud slår verdseinar Alcaraz i kvartfinalen.

Verdsfiraren har den siste tida slitt med ryggen, som har gjort at prestasjonane på tennisbana ikkje har vore slik ein har sett av han tidlegare.

Under dei tre siste turneringane, rauk dansken ut i første runde. Han har også trekt seg frå fleire turneringar, seinast frå Laver Cup.

Ifølge mora og manageren hans, Aneke Rune, skal smertene ha dempa seg, og sonen skal vere klar for å spele turneringa i Beijing.