Uno-X med sin første topp ti plassering etter massespurt

Etappen som syklistane skulle gjennom, vart spådd å bli ein dag for dei raske spurtarane, sjølv om ryttarane skulle over fem stigningar.

Lorena Wiebes (SD Woorx) vann dagens etappe, etter at feltet tok igjen eit solobrot rett før målstreken.

Det vart forsøkt to solobrot under etappen. Kathrin Hammes var den første som fekk eit forsprang på feltet, men med omtrent 80 kilometer igjen av etappen, var feltet samla igjen.

Julie van de Velde gjekk så åleine i brot, og fekk ei stor luke. Med 36 kilometer igjen av etappen, hadde ho omtrent to minutt ned til hovudfeltet.

– Det er noko av det tettaste eg har sett, seier Discoverys kommentator Andreas Staune-Mittet.

Susanne Andersen, Uno-X-syklist, enda som nummer åtte på dagens etappe, og vart med det beste nordmann.

– Det er veldig, veldig godkjent av den norske meisteren, seier Staune-Mittet.

Til TV 2 fortel syklisten at ho følte seg bra, men blei hindra.

– Det var eigentleg mykje stress i feltet med å halde posisjonen. Eg kjente veldig tidleg at presset var på. Eg bomma litt på svingen og måtte bremse litt, sa Andersen til TV 2 og la til:

– Eg trur eg blei hindra av folk som datt av spurtopptrekkarane. Eg ville ikkje gamble for mykje, heller.

Andersen har uttalt til Discovery at det er dei første etappane av touren som passar ho best:

Marte Berg Edseth måtte bryte rittet på grunn av sjukdom. Etter etappen på måndag, låg Edseth sist av Uno-X-ryttarane.

Det er no to norske ryttarar igjen på laget, Susanne Andersen og Mie Bjørndal Ottestad.

Også Coop-Hitec-ryttar Lucie Jounier måtte bryte undervegs i etappen.

Onsdag skal ryttarane gjennom den fjerde etappen, som går frå Cahros til Rodez, og er 177.5 kilometer lang. Touren går over åtte etappar.