Kjempeskrell i Giroen: – Mildt sagt overraskande

Benjamin Thomas gjekk til topps på etappe fem av Giro d'Italia onsdag. Det er hans første Grand Tour-etappesiger.

Med omtrent 77 kilometer igjen av etappen danna det seg eit brot med fire ryttarar. Der sat Thomas, Michael Valgren, som har ein fjerdeplass frå Tour de France i 2018, og to Grand Tour-debutantar: Enzo Paleni og Andrea Pietrobon.

– Vi gjorde ein utruleg god jobb. Med ti kilometer igjen av etappen visste vi at det ville bli tøft for feltet å ta oss igjen. Eg kan ikkje tru det, sa Thomas i sigersintervjuet.

Hovudfeltet tok innpå sekund på sekund, men brotet heldt heile vegen inn.

– Det er første ordentlege brotsiger. Vi har fått nokre sigarar frå soloryttarar, men eit skikkeleg brot på denne måten har vi ikkje hatt endå.

Med få meter igjen sat Pietrobon inn ein støyt og fekk nokre meter. Ingen svarte umiddelbart, men så kom angrepet med 200 meter igjen. Det enda med ein spurt der Thomas hadde mest i beina, og han kunne med det ta den første Grand Tour-sigeren i karrieren.

Danske Valgren vart nummer to, medan italienske Pietrobon vart nummer tre. Førstnemnde var svært rørt etter andreplassen.

– Det er Giroen, sjølvsagt betyr det mykje. Berre få år tilbake visste eg ikkje om eg hadde ein kontrakt eingong. Eg er takknemleg for at eg framleis kan vere syklist, sa Valgren til Discovery etter målgong.

Tobias Foss var involvert i ein velt med 25 kilometer igjen av etappen. Han kom seg opp igjen på sykkelen og sykla vidare. Laget fortalde i etterkant at nordmannen har det fint.

– Han har det bra. Han var litt lei seg i starten, så han treng nok ein arm rundt seg i kveld, men eg tipper det går fint. Han er ein tøff gut, men vi må passe på han litt, sa sportsdirektør Zak Dempster på X.

– Med to dagar igjen til tempoen er dette dårleg timing, sa Magelssen.

Torstein Træen måtte bryte rittet tysdag etter ein velt på opningsetappen.