Blei vraka til OL – no legg han opp

Erling Holst Øyasæter kjempa om ein plass i ein av dei norske båtane som skal til OL i Paris. Slik vart det ikkje.

No vel osingen å legg opp som idrettsutøvar.

– Diverre må alle eventyr ein dag ta slutt, og no er tida inne for det. Eg skal ikkje til OL denne gongen heller, og sjølv om det ikkje er lenge sidan dommen falt, er eg ganske sikker på at dette var siste gong eg prøvde, skriv Øyasæter på Instagram.

– Det har vore ei rar tid på mange måtar. Det er rart å ha sommarferie, for det er lenge sidan eg har hatt, og rart å ikkje møte opp på trening. Det er ein ny kvardag, seier han til Discovery.

Roaren fortel at valet er ein kombinasjon av fleire ting, men at OL-uttaket gjorde avgjerda klar.

– Det har vore eit lite ultimatum for min del. Sidan det ikkje vart OL, følte eg at det var ganske definitivt, seier han og held fram:

– Eg har heile tida unnskyldt satsinga med at eg nettopp har begynt, så eg kan bli betre til neste år. Det har eg blitt, men eg kjente no at eg eigentleg ikkje er der eg drøymde om å vere. Eg føler det er eit stykke opp til medaljane at eg ikkje klarer å forsvare det ovanfor meg sjølv.

– Då eg var yngre hadde eg ingen tanke om at idrett skulle bli vegen. Eg begynte å ro igjen med ein kompis for gøy for ti år sidan. Det bala eigentleg på seg, og då eg flytta til Oslo fekk eg plass på landslaget. Det var ikkje planen, men det blei sånn.

Når karrieren no er over planlegg Øyasæter å fullføre mastergraden sin, som han har kombinert med roinga.

– Eg skal fullføre mastergraden i kybernetikk og robotikk og få meg jobb. Eg skal også helde fram med trening for gøy. Eg skal nok hive meg på nokre konkurransar.

Sjølv om det ikkje blir OL på Øyasæter heiar han framleis på lagkameratane som skal konkurrere i Paris.

– Då kjem eg til å ha lyst til å begynne med roing igjen. Eg elskar roing. Det blir nok tøft, men også spennande å sjå lagkameratane på TV.

Noreg skal stille fire båtar i OL. Dei stiller med følgande utøvarar:

Thea Helseth, Inger Seim Kavlie, Kjetil Borch, Martin Helseth, Lars Martin Benske, Ask Jarl Tjøm, Kristoffer Brun, Jan Oscar Stabe Helvig, Jonas Slettemark Juel, Erik André Solbakken,

Reserve M4X: Ole Amund Storlien.