Måtte utkonkurrere broren for ein OL-plass: – Litt vanskeleg

Under OL i Tokyo sikra Hermann Tomasgaard Noregs første medalje i segling sidan 2004. Når OL i Paris går av stabelen er det 20 år sidan Noregs førre OL-gull i idretten, og det er seglaren frå Drøbak svolten på å endre.

– Det hadde vore veldig gøy. Vi har hatt god framgang i segling siste åra, så det hadde vore veldig gøy om vi kunne tatt eit gull, seier Tomasgaard til Discovery.

– Eg vil ta ein ny medalje, helst i gjævare valør, men eg seier ikkje nei takk til bronse ein gong til. Segling er ein utandørsidrett, og det er mykje som speler inn, men eg skal vere med i kampen og sjå kva det blir til slutt. Eg må berre gje det beste forsøket eg kan. Går det ikkje så går det ikkje.

Tomasgaard starta med segling i barndommen etter at faren hans kjøpte ein seglbåt.

– Eg er frå Drøbak, og det er ein fin segleforeining der. Pappaen min var veldig mykje ute på vatnet og fiskinga, så han kjøpte seg ein liten seglbåt. Då vart eg dratt litt inn i det.

Sidan den gong har segling vore ein stor del av livet.

– Eg hadde nokre venner som også begynte med segling. Mange av dei beste vennane mine har eg møtt gjennom det.

På vegen mot OL-plassen måtte han utkonkurrere sin eigen lillebror som også hevdar seg i toppen. Noreg får nemleg berre sende ein utøvar innanfor kvar disiplin i segling.

– Det er litt vanskeleg å konkurrere mot bror sin, men det er sju år mellom oss, noko som gjer det litt lettare. Hadde vi vore omtrent like gamle, så hadde det nok vore vanskelegare.

– Ein og annan gong blir eg irritert om han slår meg, men omvendt går det bra. Han blir ikkje sur om eg slår han.

I tillegg til å vere konkurrent fungerer lillebroren som ein svært god treningspartnar.

– Han stiller opp med ein gong. Det er veldig hyggeleg å trene med han, og det er ein stor gevinst å ha ein som stiller så mykje opp.

Tomasgaard har tidlegare uttalt til Discovery at dette mest sannsynleg blir hans siste OL.

Ifølge han er ikkje segling ein lukrativ livsstil. Han har dei siste ti åra kombinert det med å studere.

– Det har vore litt frustrerande nokre gonger. Eg er litt perfeksjonist, så det har vore periodar der eg har følt at eg ikkje har fått til nokre av delane perfekt. Det har irritert meg, seier Tomasgaard og held fram:

– I fjor vår skreiv eg masteroppgåve i marinteknikk ved sidan av satsinga. Det vart mykje jobb. All pause frå seglinga var skula, og all pause frå skulen var segling og trening.

Det er ikkje berre på herresida at Noreg hevdar seg internasjonalt i segling. 19 år gamle Mina Mobekk har også segla inn gode resultat blant verdseliten.

I august enda ho på 4. plass i VM, og kvalifiserte seg med det til OL.

Tomasgaard ser positivt på den norske utviklinga.

– Vi er i ein veldig god posisjon no. Eg trur det kan bli eit bra OL.