Kan få meisterskapsdebuten på heimebane: – Finst ikkje ord

Då Thorir Hergeirsson tok ut VM-troppen vart Maja Furu Sæteren den store overraskinga. Ho står med null landskampar, men er no aktuell for å spele verdsmeisterskap.

– Det å få beskjeden var ekstremt stort. Eg har sett veldig fram til dette, seier Sæteren til Discovery på samling med landslaget i Hamar.

Larvik-spelaren har bøtta inn med mål i Rema 1000-ligaen, og står med 101 mål på 11 kampar. Det er eit snitt på 9,2 mål per kamp, som gjer at Sæteren toppar scoringslista på det øvste nivået i Noreg.

Det tok ei stund frå beskjeden kom til det gjekk opp for 20-åringen at ho faktisk skulle representere Noreg i eit meisterskap.

– Eg skjønte det ikkje i starten, men då eg køyrte bil til Hamar, og faktisk tenkte at eg skal i meisterskap, då sank det litt inn. Då kom sjølvsagt nervane og litt høge skuldrar.

Sæteren fekk landslagsdebuten sin under Posten Cup i helga, som var den siste testen før VM. No ventar meisterskapsdebuten, som attpåtil er på heimebane. Årets VM blir nemleg spelt i Noreg, Sverige og Danmark, med dei innleiande rundane i Stavanger for det norske laget, og ein eventuell kvartfinale i Trondheim.

Bakspelaren legg ikkje skjul på at det kjem eit ekstra press når ein er arrangerande nasjon.

– Samtidig vil ein nå langt og gjere det beste ut av det uansett kor ein speler. Men vi har eit bra lag, og det veit mange, så folk forventar sikkert mykje av oss.

20-åringen var ein del av laget som vann VM for junior i 2022. No kan ho altså ta på seg landslagsdrakta på eit høgare nivå. Sæteren fortel at det er stor forskjell frå junior- til seniornivå.

– Det er mykje meir tempo og fysikk her. I tillegg er det folk i alle aldersgrupper, og mange som er erfarne.

Den erfaringa vil Sæteren bruke til sin fordel. Landslagstrenar Hergeirsson var klar på at Larvik-spelaren først og fremst var tatt ut til å lære, då han presenterte troppen.

– Eg er her for å lære. Det er mange store profilar som eg kan få tips og tilbakemeldingar frå. Så kan eg forhåpentlegvis bidra med det eg er god på, som er skot og overblikk for spelet.

– Ho er ein ordentleg «goal-getter», og eit slikt snitt av mål er det lenge sidan eg har sett liknande. Det seier sitt om kva type skyttar ho er. Og sjølvsagt gøy å ha med nokon som er så ung og talentfull, seier Bredal Oftedal til Discovery.

Noreg speler første VM-kamp onsdag 29. november.