OL-billetten innan rekkevidde for Noreg etter nervepirrande avslutning

Noreg fekk ein draumestart på OL-kvalifiseringa då dei vann mot Portugal torsdag kveld.

Landslagstrenar Jonas Wille legg ikkje skjul på at det var ein viktig siger.

– Det er godt, fordi vi speler om ein OL-plass, men også at vi får vise at vi kan vinne jamne kampar og avgjere ting til slutt, sjølv om det er litt jamnt, sa Wille til Discovery etter kampslutt.

No må handballgutane vinne over anten Ungarn eller Tunisia for å sikre ein plass i OL i Paris. Dei kampane blir spelt laurdag og søndag.

I førekant av kampen var landslagsspelar Tobias Grøndahl tydeleg på at han ville at Noreg skulle få revansj etter EM i januar, som ikkje gjekk Noreg sin veg.

Det sa stjernespelar Sander Sagosen seg einig i.

– Vi har hatt revansje i kroppen i lang tid etter den januaren vi hadde. Vi klarar å ri det ut, og det er vi nøgd med.

Noreg gjekk opp i leiinga på 5-4, og derifrå såg dei seg aldri tilbake.

– No likar vi det vi ser, sa Myhre.

Dei auka leiinga utover omgangen, og Noreg kunne gå til pause med ei femmålsleiing. Det kunne derimot vore ei endå større leiing, men Portugal klarte å redusere i siste sekund etter at Noreg mista ballen i siste angrep.

Discoverys handballekspert Ole Gustav Gjekstad var også fornøgd med det han såg frå dei norske herrane.

– Det var ein glimrande førsteomgang av Noreg. Dei har god kontroll på kampen, mykje takka vere målvaktsspelet til Torbjørn Bergerud, men også på grunn av eit godt og variert angrepsspel utover omgangen. Dei kjem til gode sjansar i nesten kvart einaste angrep.

Noreg heldt Portugal på god avstand utover andreomgangen, men med tolv minutt igjen på klokka kraup motstandarane sakte men sikkert innpå. Dei reduserte frå 26-21 til 26-23.

Det tok fire og eit halvt minutt før Noreg klarte å få inn ei scoring og auke leiinga.

I sluttminutta var det to mål som skilte laga. Simen Lyse scora tre på rad, medan Bergerud kom med nokre sentrale redningar, som var med på å sikre sigeren for Noreg.

Laurdag 16. mars frå 19.00 Noreg - Ungarn

Søndag 17. mars frå 18:00 Tunisia - Noreg