Fleire verdsstjerner i troppen: – Vi har fleire enn tre gode spelarar

– Det handlar om å jobbe hardt med kvarandre heile tida, og om å leie eit lag med den erfaringa dei beste spelarane har.

Det seier Ada Hegerberg ei veke før VM blir blåst i gong i Australia og New Zealand.

Av spelarane i troppen, har over ein tredjedel vunne liga- eller cupgull denne våren. Hegerberg trur likevel ikkje at klubbsuksess er einstyda med suksess i eit meisterskap.

– Kvar individuell suksess er eit pluss for eit landslag, og ein vinnarerfaring er viktig å dra inn i eit lag. Samtidig må ein ha forståing for at klubb og landslag er to vidt forskjellige arena, og eg trur ting fungerer veldig annleis i forhold til kva ein er vand med i kvardagen.

Hegerberg utdjupar at rollen ein har i ein klubb kanskje kan bli annleis på eit landslag. Tida vil vise om alle har funnet rolla si på landslaget.

– Det veit vi aldri før vi «kicker» i gong meisterskapet. Det er noko som er i konstant arbeid, og som vi jobbar med kvar dag.

Lyon-spelaren trur det viktigaste er at alle har forståing for kvarandre og si rolle.

– Spelarane må erkjenne rolla si, og kva den går ut på, slik at vi heile tida skal kunne dra dei individuelle kvalitetane inn til eit sterkt kollektiv.

Guro Reiten meiner også at det er viktig å bli samspelt som lag.

– Fotball er eit lagspel, og det vi skal gjere under VM skal vi gjere saman. Vi må prøve å få det beste ut av kvar enkelt spelar, så er alt mogleg, seier ho.

Reiten og Hegerberg har, i lag med Caroline Graham Hansen, blitt omtalt som ein stjernetrio, men Reiten meiner at det er fleire gode namn i troppen:

– Vi har fleire enn berre tre gode fotballspelarar. Vi har 23, spør du meg.

Chelsea-spelaren meiner dei må bruke tida fram mot opningskampen bra, for at laget skal få maksimalt ut av angrepstrioen.

– På dette nivået her kjem vi nok ikkje til å skape altfor mange sjansar, men vi må vere ekstremt skarpe når vi får den. Vi må bruke tida på å lære kvarandre å kjenne. Vi kjem frå ulike klubbar og kvardagar, og det tar tid å vite kva kvar enkelt ønsker og vil, og spele kvarandre god.