Ruud møter 37-åring – trur éin del av spelet blir avgjerande

Etter sigeren mot Alex Bolt i opningskampen er Casper Ruud klar for andre runde runde i Wimbledon-turneringa.

I neste runde venter 37-åringen Fabio Fognini som er rangert som nummer 94 i verda.

– Han er utfordrande å møte, for ein veit aldri kva som kjem ut av racketen hans, seier Ruud om motstandaren.

Under kampen mot Bolt var Ruud spesielt fornøgd med eigen serving. Det trur han blir nøkkelen også mot italienaren.

Discoverys tenniskommentator Svein-Espen Lindås Olsen trur Ruud har ein god moglegheit å ta seg vidare, og dermed kome til tredje runde for første gong.

– Det skal vere overkommeleg for Casper med godt spel , sa Lindås Olsen då trekninga vart klar.

Ruud og Fognini har møtt kvarandre tre gongar før, og Ruud står med tre sigrar etter oppgjera. Dei har derimot aldri spelt mot kvarandre på gras på ATP-touren.

Nordmannen har ikkje sine beste resultat frå grasunderlaget. Det lengste han har kome i Wimbledon er andre runde, medan italienaren på si side har kome ei runde lengre.

– Vi får sjå korleis det går derifrå, og om eg klarer å føle meg meir og meir komfortabel på graset.