Langar ut mot tidlegare stjernetrenar: – Fullstendig unødvendig

Holger Rune sin tidlegare trenar Boris Becker gjekk offentleg ut på X og kommenterte trenarsituasjonen til det danske stjerneskotet i starten av Wimbledon-turneringa.

21-åringen har nemleg med seg sin danske trenar Kenneth Carlsen til Wimbledon, i staden for Patrick Mouratoglou, som har vore med i dei siste turneringane. Sistnemnde er derimot i London, berre ikkje med Rune, noko som fekk Becker til å reagere.

– Kjapt spørsmål: Eg ser Patrick Mouratoglou i London, men ikkje med Holger Rune i Wimbledon. Jobbar dei framleis i lag? skreiv Becker.

– Det er kjemperart at du ikkje spør meg dette direkte når vi tekstar saman om andre ting, svarte Rune på X.

Etter avansementet til andre runde av Wimbledon utdjupa Rune hendinga.

– Det er fullstendig unødvendig, om eg skal vere ærleg, og veldig, veldig rart frå hans side. Eg og Patrick jobbar saman, og eg og Kenneth jobbar saman. Eg har planlagt kva veker dei skal vere med meg. At det blir stilt spørsmål ved ting som ikkje folk veit, fordi dei ikkje er i teamet mitt, det kan dei ikkje blande seg i, seier Rune ifølge Ekstra Bladet.

Rune fortel vidare at dei har snakka om det og fekk løyst det raskt.

Becker trena Rune frå oktober 2023 til februar i år.

Trenarsituasjonen til 21-åringen har fått stor merksemd det siste året. I 2023 avslutta han samarbeidet med både stjernetrenar Mouratoglou og mangeårige trenar Lars Christensen. I tillegg avslutta han samarbeidet med Severin Lüthi etter berre 40 dagar.

I februar vart han gjenforeina med Mouratoglou, og Rune slår fast at trenarsituasjonen no er under kontroll.