Ruud i storform like før karrierens store mål: – Kanskje den største favoritten

Det er klart for årets andre Grand Slam. Denne gongen er hardcourtunderlaget i Melbourne bytta ut med den raude grusen i Paris, som er Casper Ruud sitt favorittunderlag.

– Det er no Casper skal vere best. Det er berre å glede seg. Eg var tidleg ute i år og sa at han skulle vinne Roland Garros. Det er tøft å seie, men kvifor ikkje? Dette kan bli året hans, seier Discoverys tenniskommentator Svein Espen Lindås Olsen.

Ruud har vist seg å vere i storform så langt denne sesongen. Han har vore i fire finalar, og i Barcelona Open vann han sin største tittel så langt i karrieren då han slo Stefanos Tsitsipas i ATP 500-turneringa.

Det lyder godt før Roland Garros.

Sjølv om Ruud har spelt inn gode resultat på bana, trur ikkje Lindås Olsen at Ruud sender eit skremmeskot til konkurrentane i førekant av Roland Garros.

– Dei veit allereie kor god Casper er. Han har spelt finalar to år på rad, og no slo han Djokovic i Monte Carlo. Det er eit teikn på at Casper har blitt endå farlegare. Det er ikkje eit skremmeskot, for eg trur alle er klar over at Casper går inn på Roland Garros som ein av favorittane.

Det får han støtte i frå Discoverys tenniskommentator Ola Bentzen.

Han hadde ikkje blitt overraska om Snarøya-guten vann ei Grand Slam-turnering.

– Når eg ser kva han har gjort dei siste tre åra, tenker eg at han vil klare det i år eller i løpet av dei fem neste åra. Det er sjølvsagt ingen garanti, og eg tar det som ein stor bonus om vi får ein norsk vinnar av ein Grand Slam i mi levetid, men eg synest absolutt det er realistisk.

Bentzen trekk også fram namn som Novak Djokovic, Stefanos Tsitsipas, Alexander Zverev, Carlos Alcaraz og Jannik Sinner som store utfordrarar. Mange har også nemnt Rafael Nadal som ein favoritt.

Djokovic har stått over mange turneringar så langt i år, og har berre spelt 15 kampar. Nadal har på si side slitt med skade i over eitt år. Sjølv om dei to tennisprofilane ikkje har levert i nærleiken av det nivået dei har gjort tidlegare, vil ikkje Ruud avskrive dei inn mot Roland Garros.

Verdseinar Djokovic vann i fjor tre av fire Grand Slam-titlar og tok til saman sju titlar gjennom sesongen. I år står han utan ein einaste ein.

– I mine auge er han framleis ein av favorittane til å vinne Roland Garros i år. Han gjorde det i fjor og han er ein så god spelar når han verkeleg vil og er på sitt beste, noko han nesten alltid er, seier Ruud.

Ruud har vore i finalen i Roland Garros to gongar. Då stod Djokovic og Nadal på motsett side. Sistnemnte har vunne turneringa heile 14 gongar. Djokovic har på si side vunne tre gongar.

Det har inspirert nordmannen.

Nordmannen beskriv ein finale i Roland Garros mot Nadal som ein av dei tøffaste utfordringane i alle sportar, fordi spanjolen aldri har tapt ein finalekamp der før. Likevel hadde han trua på seg sjølv då han gjekk inn i finalen i 2022.

– Heilt ærleg, eg gjekk ut der og tenkte at kanskje i dag var dagen han skulle tape ein finale. Kom igjen, nokon må jo slå han éin gong!

Det skjedde ikkje den gongen. I staden vann Nadal med settsiffera 6-3, 6-3, 6-0.

– Det var nesten som han var i hagen sin og leika med meg. Eg skulle ønske eg kunne spelt meir aggressivt, men det er ikkje enkelt å få til noko mot han på grus. Først tar han ut beina dine, så tar han hovudet etterpå. Han riv deg ned frå ein stad til ein annan. Det var ikkje den kjekkaste kampen eg har spelt, men det var ei bra oppleving.