Ruud med overtydande siger – braut barriere

AvSofie Flølo Dyrstad

Oppdatert 08/10/2023 klokken 11:59 GMT+2

Casper Ruud hadde ikkje noko problem med å ta seg vidare til fjerde runde i Shanghai Open.

Ny solid siger for Ruud: – Må prøve å ri på bølga

Følg Casper Ruud i Shanghai Masters på Eurosport.no og discovery+.

Casper Ruud - Cristopher Eubanks 2-0 (6-4, 6-2).

Det norske tennissesset har levert botnsolide kampar så langt i Shanghai Masters, og søndag morgon var ingen unntak.

Rolex Shanghai Masters

Skrell i Shanghai – Alcaraz røk ut

11/10/2023 klokken 15:00

Ruud møtte amerikanske Christopher Eubanks, rangert som nummer 32 i verda, i den tredje runda av Masters 1000-turneringa. Nordmannen leverte sterke games, gode servar og eit godt returspel, og Eubanks måtte til slutt sjå seg slått i strake sett.

– Ein ryddig, fin framsyning av Casper Ruud. Han vinn heilt fortent i to strake sett i dag, sa Discoverys tenniskommentator Ola Bentzen.

24-åringen er med den sigeren vidare til fjerde runde.

– Det kjennast bra. Å allereie vere i fjerde runde er ein bra ting. Eg har ikkje brukt for mykje tid ute på bana så langt i denne turneringa, så eg har mykje energi og krefter til å fortsetje turneringa, sa Ruud i sigersintervjuet.

Ri vidare på bølga

Opningssettet var nokså jamn, men Snarøya-guten la tideleg press på motstandaren, og fekk kampens første breakball allereie i amerikanaren sitt andre game. Men det var ikkje før det stod 2-2 på tavla at nordmannen lykkast med å bryte.

Ruud heldt den fordelen, og tok det første settet 6-4.

I andre sett braut Ruud nok ein gong på 2-2, men Eubanks var i nærleiken av å svare på brotet i neste game. Han hadde tre breakballar, men det var ikkje nok til å halde ein formsterk nordmann unna, som gjekk opp til 4-2 på tavla.

Ruud braut på nytt då det stod 4-2, og 24-åringen trengte berre å serve heim neste game for å setje sine norske bein i runde fire av turneringa.

Det vart ingen problem for Snarøya-guten, som spelte seg fram til to matchballar, og tok det andre settet 6-2.

– Eg er fornøgd med korleis spelet sit. Det var ein fin og bra match i dag. Alt gjekk min veg, så det må eg ta med meg vidare, og prøve å ri på ei lita bølge som ein har klart å starte her no, seier Ruud.