Ruud vidare i Hamburg etter tøft førsterundeoppgjer: – Andre sett var ikkje bra

Casper Ruud møtte argentinske Sebastián Báez i første runde av Hamburg European Open.

Det blei eit tøft oppgjer, men nordmannen drog i land sigeren til slutt.

Nordmannen tok første sett, til trass for ein litt trøblete midtdel, der Báez braut Ruud tilbake.

I andre sett klarte argentinaren å bryte Ruud i andre game, mykje på grunn av at Ruud blei dømt for fotfeil. Det var Discovery-kommentator Sverre Krogh Sundbø svært overraska over.

Báez tok dei tre første gama, før Ruud henta seg tilbake, og tok neste game. Argentinaren ville ikkje la Ruud ta nokre fleire. Han tok dei tre neste gama sjølv, og tvinga fram eit tredje og avgjerande sett.

Det siste settet vart svært jamnt.

Marginale grunnlinjemissar frå Báez gjorde at Ruud fekk ein god start på det tredje settet, og tok det første gamet. Báez heldt serven i andre game, og gjekk sigrande ut av ein hardtslåande duell.

– Pila har svinga litt meir Ruud sin veg litt meir i avgjerande sett, men når ein ikkje tar vare på moglegheitene, svingar det frykteleg fort på tennisbanen, sa Sundbø då det stod 2-2 i avgjerande sett.

Ruud braut så Báez, men argentinaren slo tilbake, og gjorde akkurat det same.

– Det var tøft. Skikkeleg tøft, seier Ruud til arrangøren etter kampen.

Ruud fortel at det tok litt tid for han å justere seg etter bana.

Nordmannen møter chilenaren Cristian Garin i neste runde.