Fekk sin første Grand Slam-siger etter sensasjonell snuoperasjon

Sinner vann søndag Grand Slam-turneringa Australian Open etter at han slo Daniil Medvedev.

Medvedev leia 2-0, men Sinner snudde kampen fullstendig.

Etter tre timar og 45 minutt sikra Sinner sin første Grand Slam-tittel. Det gjorde han på første forsøk. Finalen var nemleg italienaren sin første Grand Slam-finale.

– Eg er veldig stolt. Det var ein tøff kamp, og no har eg så mange kjenslar, seier Sinner til Discovery.

Medvedev fekk kampens første breakmoglegheit. Den utnytta han og gjekk opp til 2-1. Han braut italienaren for andre gong på 5-2 og tok dermed det første settet.

I starten av andre sett klarte derimot Sinner å stå i mot heile fire breakballar, men så vart han sjanselaus. Medvedev braut to gongar og tok fire games på rad.

– Han er eit mareritt å spele mot, denne russaren her.

Då vakna italienaren, og fekk sin første breakmoglegheit i kampen. Den utnytta han. Det var likevel ikkje nok til å halde Medvedev unna å ta det andre settet også.

– Han starta veldig bra. Eg klarte ikkje å følge kampplanen min, men plutseleg snudde kampen, seier Sinner til Discovery.

Sinner slo hardt tilbake i neste sett, og braut Medvedev ved siste moglegheit. Dermed blåste han også liv i kampen for sin eigen del.

Ein identisk situasjon skjedde i fjerde sett. Ved siste moglegheit sikra Sinner settet, og spelarane måtte ut i eit femte og avgjerande sett.

– Sinner har snudd kampen. Dette er heilt vilt, sa Lindås Olsen.

I det femte settet var det berre Sinner som klarte å bryte motstandaren, og dermed sikra han tittelen.

Sinner var peika ut som favoritten av Discoverys tennisekspertar før finalen. Han har vore nærmast ustoppeleg gjennom turneringa, og stod med fem av fem sigrar i strake sett fram til semifinalen. Der slo han ut verdseinar Novak Djokovic.

Medvedev hadde ein langt meir krunglete veg, og vann berre éin kamp i strake sett. Russaren har spelt tre femsettarar som har vart både lenge og til langt på natt.

– Vi trudde vi skulle få sjå ein utslitt Medvedev i dag, men han har vore ein duracellkanin, sa Lindås Olsen etter dei to første setta.

Til slutt tok derimot Medvedev sine kreftar slutt.

Årets finale er den første finalen sidan 2005 der ingen av dei «tre store» tennisspelarane, Novak Djokovic, Rafael Nadal eller Roger Federer, har stått i finalen.

– Det skiljet kom i grevens tid, og er det største skiljet som har kome til no. Ein må seie at det generasjonsskiftet er sterkt i gang i alle fall, sa Discoverys tennisekspert Dorthea Faa-Hviding under studiosendinga.