Stenberg med ny EM-medalje: – Eit nytt kapittel i baneeventyret

Laurdag stod to EM-øvingar på programmet for norske Anita Yvonne Stenberg.

31-åringen starta kvelden med å ta sølv i poengritt.

– Endå eit nytt kapittel i det norske baneeventyret er skrive, denne gongen med sølvkanta skrift, sa Discoverys sykkelkommentator Theis Magelssen.

Med fire spurtar igjen av poengrittet låg Stenberg i leiinga. Det vart ein dramatisk kamp mellom Stenberg og førehandsfavoritten Lotte Kopecky utover.

Kopecky tok til slutt gullet etter å ha levert eit perfekt poengritt.

– Den stabiliteten ho har no, Stenberg, den kapasiteten, det ritthovudet ... Ho gjennomfører eit så og seie perfekt poengritt. Det er berre at Kopecky var betre i dag, seier Magelssen.

Berre minuttar seinare var Stenberg i aksjon i ny medaljeøving. Denne gongen i øvinga eliminasjonsritt.

Kopecky var også på startstreken i øvinga.

Med seks ryttarar igjen begynte både Kopecky og Stenberg å vise svaksheitsteikn.

Stenberg vart til slutt nummer seks i eliminasjonsritt. Kopecky tok sitt andre EM-gull på ein halvtime.