Skuldar sykkelstjerne for juks – får sportssjefen til å sjå raudt

I podkasten «Les Grandes Gueules du Sport» gjekk den tidlegare syklisten Jérôme Pineau hardt ut mot Sepp Kuss og Jumbo-Visma-laget.

Pineau skuldar Jumbo-Visma-ryttaren for mekanisk doping, altså at han får hjelp av ein motor på sykkelen sin. Han grunngjev klagen med Kuss sitt angrep på Col de Tourmalet i den 13. etappen av La Vuelta. Der syklar samanlagtleiaren av rittet frå dei øvrige favorittane, og blir nummer to etter lagkamerat Jonas Vingegaard.

– Vi kan alle sjå bilda. Sjå på Sepp Kuss sitt angrep på Col du Tourmalet mot ryttarar som Juan Ayuso og Cian Uijtdebroeks, som ser talentfull ut, og Marc Soler. Dei er vel ikkje dårlege på sykkelen! seier den tidlegare syklisten og held fram:

Franskmannen meiner også at Jumbo-Visma-ryttarane tar fleire meter per tråkk enn andre i feltet. Det reagerer han på.

– Dei tråkker fire gonger, og tar ti meter. Korleis gjer dei det?

Grischa Niermann, trenar for det nederlandske laget, fortel til Ekstra Bladet at dei ikkje driv med mekanisk doping på laget.

– Det er 100 prosent falske skuldingar, og det er småleg at vi i det heile tatt skal forhalde oss til slike dumme skuldingar.

Merijn Zeeman, sportssjef i laget, reagerer på at det er akkurat Pineau som kjem med skuldingane.

Sportssjefen refererer til B&B Hotels-laget, som Pineau var lagsjef for. Laget vart oppretta i 2018, og hadde store planar for 2023 med forventningar om ei deltaking i Tour de France. Fleire aviser, blant anna den franske avisa Ouest France, meldte også at Mark Cavendish ville bli ein del av laget, på jakt etter sin 35. etappesiger.

Slik vart det ikkje: I slutten av 2022 vart laget oppløyst på grunn av manglande sponsorinntekter.

Jumbo-Visma har dominert i La Vuelta, då spesielt trioen Sepp Kuss, Primoz Roglic og Jonas Vingegaard. På den 13. etappen av rittet tapetserte dei heile pallen i det nederlandske laget sine fargar. Dei same ryttarane har også topp tre plasseringane i samanlagtstriden.

Dominansen bekymrar Pineau.

– Jumbo-Visma hat trick? Dei internasjonale myndigheitene drep sykling. Dei er under kontroll av dei store laga. Eg ser ting som bekymrar meg.

La Vuelta blir avslutta i Madrid på søndag.