Raste mot sikkerheitstiltak – får støtte frå eksperten

Paris-Roubaix har endra den ikoniske brusteinssektoren «Arenbergskogen» i 2024-utgåva. Arrangøren har no innført ei såkalla «sjikane» like før inngangen til sektoren, for å senke farta inn i sektoren, gjennom fleire svingar i sjikanen.

Tidlegare har det kome eit hovudfelt inn i den tronge sektoren med ei enorm fart. Det har ofte ført til stygge velt.

Discoverys sykkelekspert Jens Voigt meiner det berre vil forskyve problemet.

– Risikoen for å hamne i velt er no flytta fram frå sektoren til sjikanen, enkelt og greitt. Det vil framleis vere lite plass, seier Voigt.

– Eg sykla som nummer 20 av sikkert 30. Philippe Gaumont krasja framfor meg og fekk eit brot i lårbeinet. Eg skulle klatre over den øydelagde sykkelen hans med sykkelen min i handa, og såg ned. Han skreik i smerter, og vinkelen på låret såg ikkje normal ut. Det er difor alle syklar så fort for å kome fram.

Dermed forstår Voigt kvifor arrangøren har gjort endring.

– Eg forstår intensjonen, men det er kanskje ikkje implementert perfekt.

Voigt meiner det no kan hende at ryttarane syklar fort for å bli blant topp ti inn i sjikanen. Der kan det bli like mange veltar som det var før endringa.

Ifølge den tidlegare syklisten Dan Lloyd vil det vere betre å krasje i sjikanen enn i sektoren.

Ein ryttar som ikkje verker å ha ønska endringa er kanskje den største favoritten; Mathieu van der Poel.

«Er dette ein spøk?», skreiv han på X tidlegare i veka.