Wærenskjold topp ti – beste norske plassering i Paris-Roubaix sidan 2016

Søren Wærenskjold spurta inn til ein niandeplass i Paris-Roubaix. Det er karrierebeste for nordmannen. Tidlegare var 22. plass hans beste resultat.

– Han viser ei køyrestyrke i dag, ein kløkt på brusteinen, som gjer at dette rittet kjem han til å prestere i ti år fram i tid. Ein kjempedag på sykkelen av Søren Wærenskjold. Han gjer veldig mykje riktig i dag, og får betalt for det med eit godt resultat til slutt, sa Discoverys sykkelkommentator Theis Magelssen.

– Ein vanvitig sterk køyrar på brusteinen. Det såg veldig komfortabelt ut tilsynelatande. Eg trur han tapar ein del på dei taktiske disponeringane. Han sparer ein del krefter på å ikkje stresse med posisjonering, og er stort sett på rett plass til rett tid, fram til det røyner litt på på slutten. Men dette må ha gitt meirsmak for mandalitten, sa Discoverys sykkelekspert Henrik Evensen.

Resultatet var det beste norske resultatet sidan 2016. Då vart Edvald Boasson Hagen nummer fem. I 2022 vart Alexander Kristoff nummer 12.

Kristoff vart nummer 21 søndag.

Ingen kunne stoppe nederlandske Mathieu van der Poel i Paris-Roubaix som tok sigeren.

– Det er vanskeleg å tru faktisk. Eg er kjempestolt av gutane og veldig glad for å vere ferdig, sa van der Poel i sigersintervjuet.

– Han smell til. Eit regnbogekledd lyn frå Nederland susar avgarde. Er det nokon som kan følge han over brusteinen mot Roubaix? Foreløpig er svaret «ikkje snakk om!», sa Magelssen då van der Poel fekk luka.

Vinnaren gjennomførte med det det nest lengste soloprosjektet i Paris-Roubaix si historie. Det lengste er på akkurat 60 kilometer.

– Van der Poel kan jo gjere sigersintervjuet før dei andre er i mål, braut Magelssen ut.

Tidleg i rittet var det heile to nordmenn i brot. Rasmus Tiller og Per Strand Hagenes sat i lag med blant anna Asgreen.

Med 130 kilometer igjen vart brotet tatt igjen. Då var det i staden Wærenskjold som satt inn støyten av dei norske ryttarane.

Etter den ikoniske brusteinssektoren «Arenbergskogen» sat nordmannen i ei supergruppe med blant anna Mads Pedersen og vinnaren, van der Poel.

– Dette er ein stor dag i Wærenskjold si karriere, sa Magelssen.

Wærenskjold mista kontakt med gruppa etter kvart, og enda opp i ei gruppe med ni andre, deriblant Thomas Pidcock og Tim van Dijke.

Strand Hagenes vart til slutt nummer 44 i Paris-Roubaix-debuten.