Kansellerer etappe i sykkelritt – Uno-X får ikkje sykle

Onsdag skulle blant anna Magnus Cort, Alexander Kristoff og Andreas Leknessund stå på startstreken i Etoile de Bessèges. Slik blir det ikkje.

Første etappe av sykkelrittet er nemleg avlyst. Det melder arrangøren tysdag kveld.

Ifølge den franske avisa France Bleu er etappen avlyst grunna ein protest. Det skal vere fleire demonstrantar som sperrer motorvegen i nærleiken av etappeløypa. Dermed blir det auka trafikk der syklistane skulle sykle.

Avisa skriv vidare at det også er mangel på blant anna politibetjentar til å sørge for sikkerheit rundt etappen, då dei heller må få styr på trafikksituasjonen.

Foreløpig er berre første etappe avlyst. Syklistane skal dermed i utgangspunktet framleis sykle dei resterande fire etappane frå torsdag til søndag.

Også i 2023 måtte rittet avlyse ei etappe. Den gong var det i løpet av andre etappe då ein massevelt førte til at det var mangel på ambulansar på etappen.