Ekkel overrasking for medaljehåpene: – Hunden markerte det

Helene Næss og Marie Rønningen fekk ei litt annleis opplading til OL-opninga enn kva dei er vande til. Då dei kom inn på hotellrommet i Marseille laurdag mistenkte dei nemleg at det var veggedyr der.

– Dei hadde ikkje funnet det, men hunden hadde markert at det var der, fortel Rønningen til Discovery.

Det sette i gong litt av eit opplegg for den norske duoen: Dei måtte byte hotellrom og alt dei eigde av tekstil måtte frysast ned.

Heldigvis for duoen hadde støtteapparatet nokre kle dei kunne låne, og seglekleda som dei skulle bruke søndag var aldri inne på hotellet.

– Seglekleda våre var i hamna, så dei hadde ikkje blitt utsett for noko, fortel Rønningen.

Duoen hadde ikkje begynt å klø, men dei ville ikkje ta nokre sjansar og bli vêrande på hotellrommet.

– Eg trur ikkje vi hadde sove så godt om vi hadde blitt der og tenkt at det kanskje var veggedyr. Då hadde vi sikkert klødd heile natta. Det var ei litt annleis opplading enn vi plar å ha, men vi fekk i alle fall sove, seier Næss.

Likevel såg dei positivt på situasjonen:

Næss og Rønningen ligg på 9. plass etter dei tre første seilasane i 49er FX-klassen.

– No er vi litt i angrepsposisjon, så vi får prøve å utnytte det. Vi må starte bra, gjere det vi er gode på og ta eit løp om gongen, seier Næss.

Duoen er klare på kva dei skal gjere for å nærme seg konkurrentane framfor seg:

– Vi må kanskje vere meir bestemte på kva side vi vil på i bana, og vere litt meir aggressive. No er vi i alle fall i gong, og det er godt, seier Rønningen.

Det skal gjennomførast tolv innleiiande seilas før det blir avslutta med eit medaljeseilas 1. august. Der skal dei ti beste båtane i aksjon.