Draumeopning for Mol og Sørum: – Overkøyring

I opningskampen møtte Anders Mol og Christian Sørum søskenbarna Marco Grimalt og Esteban Grimalt. Det enda med siger for den norske duoen.

– Det er utruleg deilig. Det var litt rusk i starten og litt typisk opningskamp der vi ikkje har heilt rytme på ting, men likevel klarer vi å knekke dei i første sett, og så føler eg at vi har grei kontroll i store delar av andre sett også, seier Mol til Discovery.

Laga følgde kvarandre svært tett i opningssettet, fram til det stod 13-13. Då fekk Noreg eit lite forsprang med to poeng, som dei auka vidare utover settet. Til slutt vann dei opningssettet 21-14.

Sørum er usikker på kva som gjorde at dei fekk eit forsprang.

– Vi var i bobla og såg at det var jamt heile vegen, og plutseleg var det 21-14. Eg fekk ikkje heilt med meg kva som skjedde eigentleg. Eg trur vi hadde nokre blokkpoeng, seier Sørum til Discovery før Mol bryt inn:

Den norske duoen hadde heller ikkje store problem i det andre settet. Dei fekk raskt ei leiing som dei heldt heile vegen ut.

– Det er så nydeleg å sjå. Dei er klart best, og har ingen startproblem overhovudet, sa Discoverys kommentator Jørgen Klem.

Den chilenske duoen er det dårlegaste rangerte laget i Noreg si gruppe, men Sørum ville likevel ikkje undervurdere motstandarane.

Mol og Sørum møter den italienske duoen Alex Ranghieri og Adrian Carambula Raurich i neste kamp. Den kampen går onsdag klokka 22:00.

Mol og Sørum har spelt lite kampar i år på grunn av at Mol pådrog seg eit brot i foten i mars. Han fekk operert inn skinne og var ikkje tilbake på trening i sanden før i mai.

– Vi gjekk glipp av fleire turneringar. Vi skulle helst vore forutan, sa Mol til Discovery før OL.

Duoen gjorde turneringscomeback i tsjekkiske Ostrava i juni, og har sidan den gong notert seg ein turneringssiger i Wien.

– Vi merka i Wien at ting sat, og at rytmen var på veg tilbake. Då fekk vi også sjølvtilliten tilbake.