Klar beskjed: – Blir ein krigekamp

Torsdag rauk finaledraumen til Anders Mol og Christian Sørum då dei tapte mot Tyskland i semifinalen.

– Eg var ein deppa mann etter semifinalen. Det var vanvitig bittert, spesielt for gutane. Dei visste at dei kunne bli historiske om dei vann, for ingen spelarar eller lag på herresida har vunne to OL-gull på rad, seier Max-ekspert Jan Kvalheim.

I staden for å forsvare OL-gullet må sandvolleyduoen ut i bronsefinale laurdag kveld.

– Det følast litt tomt når vi no har tapt semifinalen vi hadde veldig lyst til å vinne. No tapte vi og får spele om bronse. Vi får ta med oss det, seier trenar og far til Anders Mol, Kåre Mol.

Mol og Sørum møter den qatarske duoen Cherif Younousse og Ahmed Tijan. Det blir ein tøff motstand, ifølge trenar Mol.

Sjølv om Kvalheim er einig i utsegna, meiner han Noreg er klare favorittar.

– Eg frykta Tyskland-kampen, men no har eg senka skuldrane, sett statistikk og spelestilen til Qatar. Dei hoppar høgt og slår hardt, og Anders, som er ein av verdas beste blokkarar, elskar å spele mot det. Eg trur det blir norsk siger, men kampen skal bli spelt og poenga tatt. Det blir nok ein krigekamp.

For at Mol og Sørum skal klare å sikre en bronse, meiner eksperten at éin ting blir sentralt:

– Dei må kome opp på nivået sitt i blokk og forsvar. Mot Tyskland hadde ikkje Anders så mange blokkar, og Christian henta ikkje opp så mange ballar i forsvar. Det trur eg kjem av at det er litt enkel serving.

Finaleplassen rauk etter at tyskarane tok ein «challenge» på stillinga 14-13 i siste sett, fordi dei meinte at Mol var borti nettet då han blokka inn til 14-14. Videomaterialet viste at det var tilfellet, og dermed sikra Tyskland finaleplassen.

– Dei har nok ein irritasjon i seg som dei har lyst til å rette opp. Eg trur dei er klare for det også, seier Mol.

Eksperten trur duoen er heiltente på bronsemedaljen.

Mol og Sørum vann OL-gull i Tokyo.