Omgivnadene under OL begeistrar: – Heilt vilt

Under OL i Paris skal sandvolleyballspelarane konkurrere midt i smørauget. Bana er nemleg plassert rett ved Eiffeltårnet.

– Bana er sjukt spektakulær. Det kjem til å bli den kulaste arenaen eg kjem til å spele på i karrieren min. Ingenting slår det å spele framfor Eiffeltårnet, seier Mol til Discovery.

At det er nettopp er dei som får spele under det kjente landemerket, synest Mol er kjekt.

– Det er skikkeleg kult at det er sandvolleyballen som får «toppen av kransekake»-plasseringa.

For Mol og Sørum blir det eit annleis OL enn dei har opplevd før. Dei har nemleg aldri spelt OL framfor publikum før. Deira første OL, i Tokyo, var under koronapandemien, og det var dermed ikkje lov med tilskodarar. Dermed gleder dei seg ekstra mykje til Paris.

– Det blir heilt enormt. Vi elskar å spele framfor mykje folk og underhalde eit stort stadium.

Dei trur publikummet kan hjelpe duoen fram til eit nytt gull.

– Vi får eit ekstra giv frå publikum, og vil prestere endå betre. Det blir skikkeleg kult.

I slutten av mars fekk Mol eit brot i foten under ein treningskamp. Han går dermed på krykker, og må gjere det i omtrent tre veker til.

OL-oppkøyringa blir difor ikkje optimal, men han håper likevel at han kan vere i form til OL.

– Eg tar dette som ei utfordring, og vil kome tilbake sterkare enn før skaden. Eg har trua på at vi kan gjere det veldig bra, sa Mol dagen etter operasjon.

– Eg må prøve å gå med vanleg trykk på foten, så hoppe og springe litt. Eg veit ikkje kor lang tid det tar før eg er klar for å spele volleyball igjen, seier han og held fram:

– Vi har forhåpentlegvis to gode månadar før OL kjem.