Noreg med historisk OL-plass: – Jobba lenge for det

På sjølvaste nasjonaldagen klarte Noreg å kvalifisere eit stafettlag til leikane i Paris i sommar. Det gjorde dei då dei vann OL-kvalifiseringsstafetten i Mexico.

– Vi er veldig fornøgde. Det er noko vi har jobba lenge for, så det er veldig godt å innfri til forventningane, seier Vetle Thorn til Discovery.

Laget bestod av Thorn, Solveig Løvseth, Casper Stornes og Lotte Miller.

Thorn var allereie kvalifisert for OL i lag med Stornes og Løvseth, men triumfen sikra også Miller ein plass til OL.

– Vi prøvde å kvalifisere eitt lag til førre OL, men det gjekk ikkje, seier Thorn.

Under OL i Tokyo sikra Kristian Blummenfelt den første norske OL-medaljen i triatlon.

Søndag imponerte lagkamerat Løvseth nok ein gong i Mexico. Der var ho svært nære ein siger.

Ho kom til mål som ein del av ein trio i teten. På oppløpet tok danske Alberte Kjær Pedersen sigeren. Den norske jenta måtte også sjå seg slått av nederlandske Rachel Klamer med små marginar.

Løvseth svært nøgd med eigen prestasjon.

– Eg er verkeleg overraska over resultatet mitt i dag. Hovudmålet for meg og det norske laget denne helga var å kvalifisere laget til OL, noko vi klarte. Dette er ein bonus, sa Løvseth etter målgong.

Løvseth låg i fronten ved starten på sykkeldelen, noko som gav eit godt utgangspunkt.

– Eg prøvde å gå for sigeren, men eg er veldig fornøgd med tredje.

(©NTB/Discovery)