PGA: Herman Sekne vil bli topp ti i verda i golf – får prøve seg mot eliten

Torsdag får Herman Wibe Sekne PGA-debuten sin. Nordmannen har fått ein sponsorinvitasjon til Corales Puntacana Championship i Den dominikanske republikk.

– Eg kjenner Herman godt, og er veldig glad på hans vegne. Han har gjort det bra på college, vakse og fått utfordra seg, seier Discoverys golfekspert Marius Thorp.

– Eg trur han berre må gjere som Viktor Hovland: tenke minst mogleg på plassering og resultat. Han må berre fokusere på å gå ut på bana og gjere det han kan kontrollere.

– Det trur eg, om han speler sitt beste. Eg trur han også har høgare ambisjonar enn det. Han veit at om han speler to gode rundar er han vidare til resten av helga. Då er det berre å gjere det beste ut av situasjonen, og sjå kor langt det kan gå, seier Thorp.

Oslo-guten er rangert som den 15. beste amatørspelaren i verda og har levert i turneringar på collegenivå.

Sjølv om PGA-touren er eit nivå opp frå det Sekne er vand med, har amatørspelarar fleire gongar gjort det bra på PGA-touren. Nick Dunlap gjekk heilt til topps i American Express-turneringa i januar, og vart med det den første amatørspelaren til å vinne ei PGA-turnering sidan 1991.

– Vi har sett nok dømer på at dei beste collegespelarane er ganske nære nivået på PGA-touren. Det såg vi med Viktor Hovland og Ludvig Åberg også. Men det er klart at det er heilt annleis å spele collegeturnering og PGA-turnering, seier Thorp og held fram:

– Det at han er rangert høgt på collegenivå er eit kvalitetsteikn på kva han kan klare om han speler sin beste golf. Han må berre utvikle seg vidare og halde fram med å vere tolmodig.

I august fortalde 23-åringen til Discovery at han vil vere blant golfeliten innan få år.

– Eg ser for meg å vere topp ti i verda innan fem år, og eg har trua på at eg skal klare det. Eg bruker tida mi effektivt og høyrer på dei riktige folka, sa Sekne då.

Thorp meiner det er bra at Sekne har trua på seg sjølv.

– Det er viktig. Vegen dit er tøff, og det er han nok like klar på som eg er. Det er mange med akkurat same målsetjing, men så lenge han har trua på seg sjølv er moglegheita mykje større for at han skal klare det.

Den norske 2001-modellen er inne i sitt fjerde og siste år på college i USA.

Sjølv om Thorp meiner det er urettferdig å samanlikne han med regjerande FedEx Cup-vinnar Viktor Hovland i si college-tid, er det likevel nokre likskapar mellom dei to, ifølge eksperten.

– Viktor kom også til college som langt frå ein av dei beste. Han brukte tida godt, og utvikla seg. Herman har også brukt moglegheita og utvikla seg år for år, så det er nokre likskapar i korleis dei har nytta moglegheita.