Hovland med kjempeopptur – i tetsjiktet etter opningsrunda

Torsdag ettermiddag spelte Viktor Hovland opningsrunda i årets andre majorturnering. Der den første majorturneringa, The Masters, enda i at Hovland ikkje klarte cuten, starta PGA Championship svært mykje betre.

Hovland kom til slutt inn på tre slag under par totalt og ein delt 18. plass.

– Det er ein god start på turneringa, og noko å bygge vidare på. Det blir veldig spennande å sjå utviklinga vidare no, seier Discoverys golfekspert Marius Thorp.

– Det følast ikkje så bra ut, men eg er på riktig veg. Eg tviler jo ikkje på evna mi til å spele golf. Eg speler bra, så eg må berre helde fram med å jobbe i riktig retning, så er eg ikkje langt unna, sa Hovland etter runda.

26-åringen opna runda på best mogleg vis då han kunne notere ein birdie på første hol. Deretter følgde han opp med par på neste hol, før han gjekk av med to strake birdiar.

– Det er ei lang bane, så det gjeld å slå bra slag frå tee og treffe mykje fairway. Då er mykje gjort, sa Hovland då han oppsummerte runda.

På hol 17 kom rundas andre bogey, og Hovland avslutta «back nine» på -2 totalt.

Birdieshowet var ikkje like klart då Hovland gjekk i gong med «front nine». Nordmannen gjekk av med par på dei seks første hola.

På hol sju kunne han notere nok ein sirkel på scorekortet etter eit kjempeinnspel på green, og gjekk dermed ned til -3 totalt.

Hovland avslutta opningsrunda med to strake par.

Xander Schauffele leiar turneringa etter opningsrunda med ni slag under par.

Amerikanaren vart også historisk etter runda. Han er den første til å gå ei runde i PGA Championship med 62 slag.

I tillegg tangerte han rekorden for beste runde i alle majorturneringane gjennom tidene. Det gjorde han også på opningsrunda i U.S. Open i 2023.