Hovland klar for turneringscomeback: – Har noko å revansjere

Viktor Hovland har hatt ein rufsete start på sesongen. Nordmannen har berre spelt tre turneringar så langt i år, og valde å ta ei turneringspause etter The Genesis då ting ikkje sat slik golfstjerna ville.

– Resultatmessig har han ikkje vore heilt der han sjølv, og dei som følger han, håpar. Det er likevel ikkje noko dramatikk rundt det. I fjor hadde han heller ikkje fantastiske resultat frå start, men han vart betre og betre utover sesongen, seier Discoverys golfekspert Marius Thorp.

– Dette er ein travel del av sesongen. No nærmar vi oss den fasen der dei viktigaste turneringane kjem, med «signature events», The Masters, US Open, og meir. Tida har kome for å begynne å henge med, seier Thorp.

Først på programmet er Arnold Palmer Invitational. Hovland har gode minner frå den turneringa. I fjor vart han nummer ti, medan han året før kom på andreplass.

– Han føler nok at han har noko å revansjere fordi han var såpass nære dei siste åra, seier Thorp.

– Om han finn godfølelsen og rytmen, så kan han vere med å kjempe der oppe. Vi får håpe at treningsperioden før og etter The Genesis har gjort godt. Det er ingen tvil om at han må begynne å prestere for å henge med no.

Under turneringspausen har svingen vore fokusområdet for Ekeberg-guten.

– Han føler at han ikkje har hatt like god kontroll dei siste turneringane, så det er der han har brukt mesteparten av tida. Det handlar om å finne godfølelsen i svingen. Det vil vere ein katalysator for sjølvtillit, slik at han kan sleppe seg meir laus. No må han gå ut og stole hundre prosent på det han har, seier Thorp.

Etter at Hovland leverte eit skuffande resultat i AT&T Pebble Beach Pro-Am-turneringa i starten av februar, har fleire stilt spørsmål om kva som skjer med golfstjerna. Thorp meiner det er lenge til ein kan vere bekymra over nivået til Hovland.

– Det er mange år til. Ein må nesten ha eit større perspektiv på kva som har skjedd på så kort tid. Han er berre på sitt femte år på PGA-touren. Det er ei kort tid i ei lang karriere. Det er ikkje krise no.

Ifølge Thorp skal det ikkje mykje til før ein rasar ned på resultatlista – og omvendt.

– Breidda i verdstoppen er enorm. Om ein droppar nokre prosent, og dei andre ikkje gjer det, så hamnar ein langt ned på lista. Vi har også sett kva som skjer når Hovland ikkje droppar prosent – då vinn han samanlagt. Vi veit kva potensialet hans er.