Blanda følelsar etter OL-finalen: – Kjipt å tape

Laurdag kveld deltok Marie-Therese Obst i spydfinalen i OL. Der rauk ho ut etter tre kast.

– Det var veldig kult å delta. Ein opplev ikkje dette ofte, men det er mykje betre enn ein eigentleg kan førestille seg. Eg er berre stolt av meg sjølv for at eg klarte å kome meg til ein OL-finale i første OL, seier Obst til Max.

Dei åtte beste etter tre kast fekk kaste tre nye forsøk, medan dei fire resterande utøvarane var ute av konkurransen.

Det siste kastet var på 58.78 meter, og dermed klarte ho ikkje å bli blant topp åtte. Ho enda til slutt på ein 11. plass av tolv.

Spydkastaren sat igjen med blanda følelsar då ho ikkje vart blant topp åtte.

– Etter mitt tredje kast, då eg visste at eg ikkje var blant topp åtte, var det litt blanda følelsar. På ein måte var eg glad for at eg klarte å kome meg hit etter så mange år med motgang, men samtidig har eg konkurranseinstinkt, og det er kjipt å tape.

Det var ikkje ein sjølvfølge at 28-åringen skulle delta i Paris-leikane. Så seint som i mars deltok ho i sin første konkurranse på nesten tre år.

– Reisa har vore veldig, veldig lang, og veldig tung, men eg ville ikkje byta den prosessen mot nokre ting. Det er det som har gjort meg til den eg er i dag, som står her i dag i ein OL-finale. Det har vore sjukt mykje motgang, men verdt det.

Obst fortel at ho er kjempemotivert for vegen vidare:

– Motivasjonen vidare er at neste gong eg konkurrerer i ein OL-finale står ikkje Marie-Therese Obst på ein 11. plass – då rykkar eg lengre opp. Eg vil kjempe om medalje.

I juni tok Obst ein sensasjonell EM-medalje. Ho hadde den dårlegaste personlege rekorden av finalistane, men forbetra den til 63,50 som enda med bronse.