Reagerer etter Deila-sparking: – Kynisk bransje

Måndag vart det bekrefta at Ronny Deila er ferdig i Club Brugge. Nordmannen tok over hovudtrenarstillinga i starten av denne sesongen.

Landslagsspelar Hugo Vetlesen spelar på Club Brugge og fortel at det var spesielt å sjå nordmannen gå.

– Det er klart at det er det når ein har jobba med han i fleire månadar, vore på reise, trening og brukt tallause timar på trening saman, seier Vetlesen til Discovery.

Avskjeden til Deila vart grunngjeve med at resultatet var skuffande.

Det gjorde han tysdag morgon med spelargruppa. Vetlesen var ikkje til stades på grunn av landslagssamlinga.

– Eg skal ta ein telefon til han seinare for å spørje korleis det går, takke for det ansvaret han har gitt meg og for at han pusha meg kvar einaste dag.

Club NXT-trenar Nicky Hayden har tatt over laget fram til klubben finn Deila sin erstattar. Vetlesen er klar på kva han ser etter i ein trenar:

– Det er rett og slett at vi blir eit betre fotballag og at vi får betre resultat. Det trur eg klubben også tenker. Alle vil gå i same retning og ta nye steg. Eg synest vi var på god veg, men som sagt: Fjerdeplass er ikkje godt nok i Club Brugge. Vi får håpe at vi kan ta nye steg i siste del av sesongen.

Sjølv om Deila var norsk, følte ikkje Vetlesen at han fekk noko spesiell fordel frå det. Dermed bryr han seg ikkje om nasjonaliteten til den komande trenaren.

– Det har vore heilt vanleg. Ronny svarar oftare på engelsk til meg enn på norsk. Han gløymer nokre gonger at vi snakkar same språk, så det er litt morosamt. Det har ikkje endra seg at vi har vore nordmenn begge to.