Hevdar Botheim kan forlate Italia – fleire klubbar interessert

Erik Botheim har ikkje fått mykje speletid i Salernitana denne sesongen. Han har berre vore på bana i sju seriekampar og tre cupkampar.

No hevdar italienske medium at angrepsspelaren kan vere på veg vekk frå Serie A-klubben.

Allsvenskan-meistrane frå 2023-sesongen, Malmö, skal vere nærast å sikre seg 24-åringen, ifølge den italienske avisa Il Mattino. Overgangsjournalisten Gianluca Di Marzio hevdar at Botheim har fått tilbod frå fleire svenske klubbar.

– Det er ein posisjon vi ser på. Eg såg mykje på Bodø/Glimt opp gjennom åra. Han (Botheim) hadde ein fantastisk sesong der i 2021, men han har hatt det tyngre no. Men det er ein bra spelar på ein posisjon som vi ser på, seier Malmö-trenar Henrik Rydstöm til den svenske avisa.

Il Mattino skriv at det er snakk om eit lån ut året, og at den tidlegare Glimt-spelaren kan forlate Salernitana i løpet av dei neste dagane.

Botheim gjorde kometkarriere i Glimt i 2021, som gjorde at den russiske klubben FK Krasnodar ville hente Oslo-guten for ein stor sum. Overgangen utgjorde ifølge fleire medium ei totalpakke på 100 millionar kroner, som var ein norsk overgangsrekord.

I mai 2022 terminerte han kontrakten med den russiske klubben etter invasjonen av Ukraina. Botheim signerte deretter ein fireårskontrakt med den italienske klubben.

24-åringen har fleire kampar for aldersbestemt landslag.