Noreg redda poengdeling etter marerittstart

Noreg fekk det tøft heilt frå start borte mot Italia i EM-kvalifiseringskampen tysdag, men i det 80. speleminutt utlikna innbytar Frida Maanum.

– Det var godt. Det var viktig å unngå at dei fekk tre poeng, og så tar vi med oss eitt poeng heim også, sa Maanum til TV 2 etter kampslutt.

Dermed enda det nok ein gong i poengdeling mellom Noreg og Italia. Laga møtte kvarandre også på Ullevaal Stadion fredag. Der enda kampen 0-0.

Noreg har alt i sine eigne hender før gruppespelet i EM-kvalifiseringa blir avslutta i juli. Dei er eitt poeng bak Nederland, som toppar gruppetabellen. Det same er Italia.

Etter berre fem minutt gjekk det italienske laget opp i leiinga. Manuela Giugliano sat ballen sikkert i mål bak Cecilie Fiskerstrand, etter at ho stod klar då Lucia Di Guglielmo spelte seg gjennom på venstresida.

Noreg klarte å spele seg inn i kampen utover omgangen. Dei fekk fleire sjansar til å utlikne, men var både i offside og skaut ballen i tverrliggaren.

I andre omgang tok landslagssjef Gemma Grainger grep. Ho gjorde to byter i det 63. speleminutt, og inn kom blant anna Maanum, som ikkje har spelt kamp for Noreg på lenge, grunna ein kollaps i ligacupfinalen mellom Arsenal og Chelsea.

Maanum trengte berre 17 minutt før ho scora for Noreg. Noreg fekk eit hjørnespark, og frå bakerste stolpe kunne Maanum heade inn utlikninga.

– Å hjelpe laget igjen og bidra er noko eg har tenkt mykje på og gleda meg til. Det betyr veldig mykje, sa Maanum.

Begge laga heldt fram med å presse utover kampen, men til ingen nytte. Kampen enda 1-1.

Etter kampen på Paolo Mazza stadion ligg Noreg på andreplass i gruppa deira, før dei to resterande kampane i juli mot Finland og Nederland.

Dei to beste laga i kvar gruppe kvalifiserer seg direkte til EM i 2025, i lag med vertsnasjonen Sveits. Dei resterande sju EM-plassane blir avgjort etter to playoff-rundar i slutten av året.

EM blir arrangert frå 2. til 27. juli.