Turnstjerna Biles med «juniortabbe»: – Det gløymer ein berre ikkje

Simone Biles hadde eit draume-OL fram til dei to apparatfinalane måndag. Der gjorde turnstjerna fleire feil.

I frittståande trakka Biles utanfor matta to gongar, og blei trekt seks tidels poeng. Det var nok til at ho enda 33 tusendelar bak brasilianske Rebeca Andrade, som tok gullet.

I bom gjekk det derimot mykje verre for amerikanaren. Etter at fleire utøvarar datt ned frå bommen, låg alt til rette for at Biles skulle sikre sitt fjerde gull i Paris. Midt i ein kombinasjon mista ho balansen og datt sjølv ned. Dermed var ho ute av medaljekampen.

Det stoppa heller ikkje der. Etter at ho kom seg opp igjen på bommen og fullførte øvinga, vart ho trekt 0,3 poeng av dommarane.

I staden for å helse ordentleg på dommarane storma Biles skuffa ut av arenaen.

– Det er eigentleg ein skikkeleg nybyrjarfeil, ein vi kallar «juniorfeil». Det gløymer ein berre ikkje, seier Discoverys turnekspert Sofie Bråten.

Biles avsluttar dermed OL med tre gull og ein sølvmedalje.