Tok historisk OL-gull – dette er målet for OL i Paris

Under OL i Tokyo sprang Kristian Blummenfelt inn til Noregs første gull på ni år i eit sommar-OL, og det første i triatlon nokon sinne.

Sjølv om sportssjef i Noregs Triatlonforbund, Arild Tveiten, meiner Noreg ikkje er like store medaljekandidatar i OL i Paris, er måla framleis klare:

Noreg klarte å kvalifisere eit stafettlag ved siste moglegheit.

– Det er kjempestort. For min del har det vore ei viktig målsetjing i jobben min som sportssjef. Vi visste at vi måtte levere på vår siste sjanse, og det gjorde vi. Det hadde vore tøft å gå inn i OL-førebuingane utan det laget, det må eg seie, seier Tveiten.

– Vi viste at vi har medaljemoglegheit då vi vart nummer tre på eit verdsserieløp med alle dei beste i verda i fjor sommar, og då vi vann European Games. Vi veit at når vi først er i OL, så er vi der for å kjempe om medalje. Vi veit at det blir hardt, men slik skal det vere.

– Eg føler meg veldig sikker på at om alle har eit toppløp og presterer 100 prosent, så er det mogleg. Vi er veldig sterke på kvar einaste etappe, seier Vetle Thorn.

– Vi har vist at vi er jamt over veldig stabile, uansett dynamikk. Eg trur vi har like mykje sjanse som dei andre laga til å greie å få til noko sinnsjukt bra, seier Lotte Miller.

Solveig Løvseth vil ikkje gje Noreg eit favorittstempel, men meiner laget heller kan overraske.

– Vi har ein tendens til å prestere betre enn folk forventar på stafett, om vi har ein god dag alle saman.

Sportssjefen trur også herrane kjempar om medalje individuelt, sjølv om han meiner at Noreg har eit litt annleis utgangspunkt denne gongen.

I tillegg trekk Tveiten fram Velte Thorn som ein mogleg medaljekandidat.

– Vi har sett at han har løfta seg mange hakk, og det viser at han er med å kjempe om medalje. Det er veldig ope, men vi er nok ikkje like store favorittar som sist.