Spår ellevill OL-finale: – Beste som kunne skjedd sporten vår

For tre veker sidan kjempa verdstoar Novak Djokovic og Carlos Alcaraz om ein Grand Slam-tittel i Wimbledon. Søndag skal dei kjempe om OL-gullet.

– Det er ingen tvil om at dette er draumefinalen. I OL ser heile verda på, så dette er det beste som kunne skjedd sporten vår, seier Discovery-ekspert Alex Corretja.

I Wimbledon var det Alcaraz som stakk av med sigeren, men den gongen var Djokovic nyleg operert i kneet.

– Ein kan sjå at han beveger seg mykje betre enn han gjorde då. Han veit også korleis han skal takle presset, meiner Corretja.

Djokovic kvalifiserte seg til finalen etter å ha slått ut spelarar som Rafael Nadal, Stefanos Tsitsipas og Lorenzo Musetti.

Sjølv om serbaren kom heilt til finalen i Wimbledon, har han likevel hatt eit trøblete år. Han står utan ein einaste tittel. På denne tida i fjor hadde han allereie tre. Alcaraz har på si side vunne to av tre Grand Slam-titlar i år.

– Det er utan tvil ein utruleg prestasjon på så kort tid. Han er i ein god flyt. Måten han speler på, beveger seg og handterer alt på er perfekt.

Corretja meiner éin av spelarane har ein liten fordel:

– Ettersom Carlos har vunne så mange kampar og slo Novak i Wimbledon, vil det gi han eit lite forsprang inn i kampen. Spesielt på grus der han beveger seg betre og betre, og forehanden er betre. Samtidig må han også forstå at dette er ein annan type finale, seier Corretja og held fram:

– Spenninga er der for begge spelarar, men begge veit korleis dei skal takle det.

Finalen blir spelt på Roland-Garros. Der har Djokovic tre sigrar, medan Alcaraz har éin. Den kom i år.